Pynlong ka ophis u DEO da ka jingïakynduh lang baroh ki kyrtong ba aireng election ha Ri Bhoi

Nongpoh, Rymphang 16: Na bynta ban ïaid beit ïaid ryntih ka jingjied ïa ki nongmihkhmat paidbah ha kane ka kynti jong ka election 2023 hapoh ka jylla, ka ophis u District Election Officer ka Ri Bhoi u la lum lang da ka jingïalang kyrpang ïa baroh ki kyrtong na Ri Bhoi kynthup ruh ki Polling Agent na ka bynta ban ïa pynbeit ïa ki kam jong ka election ba kan long kaba ïaid beit ïaid ryntih ha ka 27 tarik u Rymphang 2023 hapoh ka jylla.
Ïa kane ka jingïakynduh lang la pynlong ha Conference jong ka ophis u District Election officer ha Nongpoh, ha kaba ha kane ka sngi nalor ki kyrtong bad ki Polling Agent na ki party bapher bapher la don ryngkat ruh u General Observer, u K. Veera Raghava Rao, IAS, bad u Narendra Kumar Dugga, IAS bad ryngkat ruh u District Election Officer u Arpirt Upadhayaya, u SP ka Ri Bhoi, u Giri Prasad, ki returning officer, u assistant returning officer na ki constituency bapher bapher ka Ri Bhoi.
La sdang ruh ïa kane ka jingïakynduh lang da ka jinghikai halor ki jingpyntreikam ïa ki EVMs bad VVPAT bad kynthup ruh ban pynshai halor ki jingdon jong ki EVMs/VVPATs ba la mang na ka bynta jong baroh ki Polling Station bad kiwei kiwei ki jingdonkam ba hap ban ai jinghikai na ka bynta ka jingjied ïa ki nongmihkhmat paidbah ha kane ka election ban sa wan kaba long ha ka 27 tarik u Rymphang.
Lyngba jong kane ka sngi la pynshai ruh sha ki kyrtong bad ki Polling Agent halor ki kyndon jong ka Model Code of Conduct bad ruh la pynsngewthuh ïa ka Representation of People Act, 1951. La pyni paidbah ruh halor ka jingpyntreikam ïa ka SUVIDHA app bad kumjuh ruh la ai jinghikai lyngba ka cVIGIL app ban ailad ïa ki paidbah ba kin lah ban ujor lada don kino kino kiba pynkhein ïa ki kyndon jong ka Model Code of Conduct.
Na ka liang u General Observer u a ban khia ruh halor ka jingpyntreikam ïa ka cVIGIL app ban ïaid beit ïaid ryntih kane ka election jied nongmihkhmat bad hadien kane la pynlong ruh ïa ka jingïakynduh lang ki Zonal Magistrates, Sector Officer bad ki Sector Police Officers ban ai jinghikai halor ka kam election ba la pynong ha Science Hall, Nongpoh, Ri-Bhoi District.
Ïa ka jingïalang la pynïaid da u General Observeru K. Veera Raghava Rao, IAS, u Narendra Kumar Dugga, IAS bad u Police Observer, u Ranjit Kumar Mishra, IPS ha ka jingdon lang u District Election Officer, u Arpit Upadhayaya, u SP ka Ri Bhoi, u Giri Prasad, ki Returning Officer bad ki Assistant Returning Officer. Na ka liang ki Observer ki la ban khia halor ka jingdonkam ban don ka jingïasngewthuh jingmut na ka bynta ban pynïaid beit ïaid ryntih ïa kane ka election ka ban long ha ka 27 tarik u Rymphang bad la ai jingpynshai ruh halor ki bynta bapher bapher kum ban ïaid beit ka election bad ban nym mih kano kano kaba ktah ïa ka shongsuk shongsain ki paidbah.