Shillong, ïaïong, 21: Ka Jylla Meghalaya ka la kynjoh haduh 50 percent ka jingpynpoi ïa ka umbam umdih ha ki manla ki thliew ïing kiba don ha ki shnong nognkyndong.
Haba pyntip ïa kane ha ka sngi Thohdieng, u Myntri uba peit ïa ka tnat Public Health Engineering (PHE) u Marcuise N. Marak u la ong, “ka tnat ka la ïaid shakhmat bad ka thong jong ngi ka long ban pyntreikam pura ïa ka jingpynpoi ïa ka umbam umdih sha ki 6.51 lak tylli ki longïingbad ngi la pynbiang ïa ki kor um sha ki 3.10 lak tylli ki longiing, kaba long mynta 47.69 per cent.”
Da kaba pyntip ba ka jylla Meghalaya ka dei ka jylla kaba la pyntreikam bha ïa ka Jal Jeevan Mission (JJM), u Marak u la ong ba ka Jylla ka la ïoh pdiang haduh T. 400 klur kum ka bai rneng ba la ai da ka Sorkar Pdeng la lai sien kynthih na ka bynta ka jingpyntrikam pura ïa ka JJM ha ka jylla.
“Ngi la ïoh jingïarap pisa ruh na ka bynta baroh shi snem. Ngi don T. 3,000 klur tam ban pyntreikam ïa ka JJM….Namarkata, ha une u snem mang tyngka ba mynta ngi hap ban leh ïa kaba bha tam ban pynpoi ïa ki kor um sha baroh ki thliew ïing,” u la bynrap.
U Myntri u la ong ba ki don lai tylli ki jingeh ba ka tnat ka la ïakynduh ha kaba pyntreikam ïa ka JJM na ka daw ka jinglong jingman jong ka jaka bad ka jingbym biang ki surok.
“Ki don ki jaka ba ka tyllong um kam don bad ka tnat ka hap ban shu ksam ïa ka um bad don pat ki jaka ba ngim ïoh ïa ka jingïatreilang na ki nongshong shnong na ka daw ka jingbym ai jaka,” u la ong.
Ha kajuh ka por, u Myntri u la ïathuh ba ka tnat ka dang ïa pynbeit ban ïoh ïa ki GI pipes bad ki HDPE plastic pipes khnang ban ïoh ïa ki pipe um kiba bha ha ka jylla baroh kawei.
“Na kata ka daw, ka Sorkar Meghalaya ka la rai ban ïoh ïa ki pipes bad ïa kine ki pipe um yn sa aiti sha ki Kontraktor ha kaba kim donkam shuh ban leit thied hi dalade na ki kompeni bad ban ïoh ïa ki pipe um,” u la bynrap.
