Shillong, ïaïong, 21: U runar u bym lah ban ithuh durkhmat, u la tied klep ïa kawei ka longkmie ïa kaba la tip kyrteng kum ka Kong Batemon Jyrwa ha Madan Umlyngka, Laimer Upper Shillong katba ka dang mih na dukan ban leit phai noh sha la iing. Kane ka la jia ha ka sngi Palei ha ka por kumba 10:30 baje mynmiet.
U nongthoh khubor ha ka jingïakynduh ïa ki bahaing hasem jong ka Kong Batemon Jyrwa ki la ïathuh ba ïa kane ka jingjia la pyntip da ki nongleit nongwan kiba la lap ïa ka Kong Batemon kaba la ïapler ha madan hapdeng ka jingphlei snam na ki bynta ba shadien jong ka khlieh.
Dei tad haduh ka por 12 baje eiei shiteng synñia ki bahaïing hasem ki la pynkit noh ïa kane ka longkmie sha Dr. H. Gordon Robert Hospital, Jaïaw ban ïoh jingsumar.
Ha kaba ïadei bad kane ka jingjia, na ka liang jong ki bahaïing hasem ki la ujor da ka ejahar ha ki Pulit jong ka Jhalupara Out Post bad ki la kyrpad ruh ïa ki bor Pulit ba kin pynlong ïa ka jingthwet kaba jur ban ïohkem ïa u briew uba donkti ha kane ka kam runar.
