Shillong, Ïaïong 21: Kum ka jingbud dien ha kaba ïadei bad ka jingkhynra Trading License jong ka KHADC kaba la pynlong hynnin ka sngi Palei ha ki bynta ka Them Ïewmawlong, mynta ka sngi Thohdieng na ka liang u Mawphor u la leit ban peit la kine ki bar jylla ba shah beh na ka daw ba kim don License la ki la wan biang ne em ban die shana bad ha ka jingleit jngoh la ïohi ba ha kane ka jaka la wan mih bujli pat da ki Khasi ban shong die jingdie.
Ha ka jingleit jngoh la ïoh ruh ban ïakren bad ki katto katne ki Khasi ba wan shong buh dukan ha kane ka jaka ba ju die shna ki bar jylla na ka liang jong ki Khasi la pynpaw ïa ka jingsngew kmen lada kin ïoh bad shong die jingdie ha katei ka jaka.
“Lada ngin ïoh shong ma ngi hangne te ka la dei ka jingkyrkhu keiñ hynrei man ka sngi nga die kwai da kaba shu ïaid beit ban tyrwa baroh shisngi hynrei lada ïoh shong hangne ka met ka la aram bad ngi kham lah die ruh ban ïa kaba man ka sngi.” ong iwei i longkmie ba wan die waidong.
“Nga wan shong hangne ruh dei hadien ba nga la wan ïakynduh bad ki Pulit jong u Syiem Mylliem kiba la ong ba nga lah ban shong hangne bad nga kyrmen kumba ki la ai jingbit kin ym beh shuh ruh na kane ka jaka,” i la bynrap.
Haba kylli la ka dei na ka jingjaituh ne ka jingbym don lad ban ïohi ba kiba bun ki nongbuh dukan ha Ïewduh ki dei ki bym dei ki Khasi, “Phin ong ba ngi jaituh seh dei bym don seng keiñ namar ha ïew tang ka bai advance kaba ki pan ki trai dukan ka la poi da ki bun lak ngi kaba ym heh bai seng te shano phi ngin kot bor bad nga kyrmen ba da ka jingïohlad ban sdang hangne ngun sa kiew keiñ ha ka ïoh kamai ban kot bor ban ïa nujor bad kiwei ki jaidbynriew kiba la heh spah,” ong kawei pat ka longkmie ba die soh.
Shuh shuh u Mawphor u la ïoh ruh bad ïakren bad uwei na ki ophisar jong ka tnat Enforcement ka KHADC u Bah Kordor Synrem uba wan ban jurip ïa kane ka jaka bad peit la kine ki bar jylla ki la wan shong biang ne em bad kumjuh ban pynlong ïa ki jingkhynra Trading license biang sha ki jaka bym pat lah pyndep hynnin ka sngi.
U Bah Kordor u la pynpaw ba ka long kaei kaei kaba sngew kmen ban ïohi ba ki doh ki snam jong ngi ki la mih shakhmat ban shimti ïa kane ka kam ‘hynrei nga kyntu ruh ba kin long kiba pyrkhat lang ïa ki nongleit nongwan ban ym tur palat sha ki jaka ïaid kjat ïoh kan pyndik noh pat ïa ki,” u la kyntu.
