25 tarik yn shong jingïalang ka Rgional Committee na ka bynta West Jaiñtia Hills District

Shillong, Ïaiong 21 : Ka Regional Committee jong ka West Jaintia Hills ba lamkhmat da u Symbud Myntri Rangbah, Bah Sniawbhalang Dhar kan sdang ïa ka jingïalang kren pynbeit pud ha ka 25tarik mynta u bnai.
Katei ka jingïalang kan ïa kren ïa kiba bun ki jaka ba kajia pud ha Block -1, Psiar – Khanduli, ong ki tyllong khubor.
Dei ha ka 24tarik Lber, ba ka sorkar jylla ka la thaw biang ïa ki lai tylli ki Regional Committee ban bishar bniah biang ïa ka jinglong jingman jong ki hynriew tylli ki jaka kajia pud kiba hap ban pynbeit bad ban phah ïa ka kaiphod hapoh ki 45 sngi.
Kitei ki jaka ki kynthup ïa ka Langpih ha West Khasi Hills District, Borduar, Nongwah – Mawtamur, Deshdoomreah, Block – II ha Ri Bhoi District nangta ka Block – I, Psiar – Khanduli ha West Jaintia Hills.
Ïa ka Regional Committee jong ka Ri Bhoi district pat yn khlieh da u Symbud Myntri Rangbah, Bah Prestone Tynsong bad na bynta ka West Khasi Hills pat yn khlieh da u Myntri ka sorkar Jylla, Bah Paul Lyngdoh.