Nongstoiñ, Nailur 09: Ka jingwan jurip jong ki dkhot ka Regional Committee on Border Dispute ïa ki shnong ki thaw bad ki jaka ki puta ha West Khasi Hills, kiba hap ha ka Langpih sector ka lah ban long ha ka taïew ba khatduh jong une u bnai Nailur.
Katkum ki thymmei khubor ba la ïoh lum, la ong ba wat la ki dkhot ka Regional Committee kim pat ai jingtip sha ki paitbah nongshong shnong ha khappud, ïa ka tarik ba kin wan bad hangno kin pynlong ïa ka jingïakynduh bad ki paitbah. Hynrei, ki thymmei khubor ki ïathuh ba ka jingpynkhreh ka la ïaid shait shait bad ha kane ka wat kaba mynta ki dkhot ka Committee kin ym pep shuh ban pyndep ïa ka kamram ba ka sorkar ka la bynshet ha ki.
Nalorkata ki dkhot ka Regional Committee kiba dei peit na ka bynta ka West Khasi Hills, ki dang ïaleh ban pynbiang lut ïa baroh ki dulir bad ki kot ki sla, kiba pynshisha ïa ki shong ki thaw bad ki jaka ki puta kiba hap hapoh ka Meghalaya la dep pynbit pynbiang da ki nongsynshar shnong kiba la pynpoi sha ka sorkar.
La ïoh jingtip ruh ba ka jingïakren hapdeng ki ar ngut ki Myntri Rangbah u Himanta Biswa Sarma jong ka jylla Assam bad u Conrad Kongal Sangma, ha kaba ïadei bad ka jingpynbeit ïa ki jaka ka dang bteng bad na ka liang jong kitei ki ar ngut ki Myntri Rangbah ki la kwah eh ban pynkut noh ïa ka jingïapynbeit ïa u pud u sam, da ka jingïasngewthuh jingmut bad da ka jingïasuk ïasaiñ na baroh ar liang khlem kano kano ka jingbuhkhoh, khnang ba kan ym don shuh ka jingwit ïa ki paitbah nongshong shnong.
Haba phai ha katei ka mat jingïapynbeit pud, lada ki ar sorkar ki ïeng ha ka nongrim jong ka jingkwah jong ki paitbah nongshong shnong bad kin peit bniah katkum ka jinglong jong ki jaka ki puta, ka riti ka dsutur, ki niam ki rukom, ka shongkha shong man, ka ktien ka thylliej, kam don jingeh ban pynshisha ba kino ki shnong kiba dei ban sah ha Meghalaya bad kino ki shnong kiba dei ban sah ha Assam.
Kumba ka long haduh mynta ha ki jaka kiba hap ha Meghalaya ym don Assamese satia, lait noh ki Khasi bad Garo bad ka don ruh ka jingïapher ha ka ktien ka thylliej, ka riti ka dustur, ka shongkha shongman bad kiwei kiwei hapdeng ki nongshong shnong jong ka Assam bad Meghalaya.
Ka long ruh kaba donkam ba ki ar sorkar ki dei ban sngap ïa ka mon jong ki paitbah, namar lada ki bor sorkar kim sngap ïa ka mon jong u paitbah wat lada la lah ban pynbeit ïa u pud u sam ruh, ka jingshah pyndik jong ki nongshong shnong kan don beit bad ka lah ban nang pynklumar shuh shuh ïa ka synshar khaddar ha ki shnong ki thaw.