Pynsangeh ka Raid bad ka HANM ïa ka jingpyntrei surok ka Assam ha Bakhlapara

Nongpoh, Nailur 09: Hadien ba la ioh jingtip ba ka sorkar Assam ka la wan rah ïa ki kam pynroi da kaba tpyntrei ïa ka surok thymmai ha ka shnong Bakhlapara ba hap ha ka Raid Warmawsaw-Umsohbar jong ka Hima Nongspung ha Ri Bhoi District, ki nongïalam ka Hynñiewtrep Achik National Movement, (HANM), Western Ri Bhoi ryngkat ki nongmihkhmat na ka Raid Warmawsaw-Umsohbar mynta ka sngi ki la leit ban pynsangeh syndon ïa ka jingwan tei ka sorkar Assam ïa ka surok ha ka shnong Bakhlapara da kaba kam ba ka sorkar Assam ka la wan kyntur pud sha u pud u sam jong ka jylla Meghalaya.
Kine ki nongïalam ka HANM, Western Ri Bhoi ryngkat ki dhot na ka Raid Warmawsaw-Umsohbar ki la leit ban pynsangeh ruh ïa ka jingwan tei ka sorkar ïa katei ka surok, ka dei hadien ba na ka liang ka Raid ka la kynnoh ba katei ka jaka ba wan tei ïa ka surok ka dang hap ha ka jylla Meghalaya hapoh ka Raid Warmawsaw-Umsohbar jong ka Hima Nongspung ha Ri Bhoi District.
Haba leit ban pynsangeh ïa katei ka jingwan tei ka sorkar Assam ïa katei ka surok la ïalam da u President ka HANM, Western Ri Bhoi, u Bah Sumar Lyngdoh ryngkat ki dkhot bad la ïa don ryngkat ruh ki nongmihkhmat na ka Raid Warmawsaw-Umsohbar ba kynthup ïa u Bah Slendar Lyngdoh, kum u Sordar Shnong ka Umsohbar bad u dkhot ka raid bad ruh u Bah Pingstone Pator, u dkhot ka Raid Warmawsaw-Umsohbar.
Kumba la pynpaw da kitei ki dkhot ka Raid ba kynthup u Bah Slendar Lyngdoh bad u Bah Pingstone Pator, ki la ïathuh ba katei ka jaka ba la wan tei surok da ka Assam ka dei kaba dang hap ha u pud u sam ka jylla Meghalaya bad kane ka dei ka jingwan leh donbor ka Asssam da kaba shna surok wat ha u pud u sam ka Hima Nongspung.
Ha katei ka jingjurip hadien ba la pynsangeh ïa katei ka jingwan tei suork ka Assam ki la pynshai ruh ba kitei ki jaka ba wan tei surok jubor ka Assam ki dei kiba hap ha u pud u sam ka jylla Meghalaya bad ki sakhi ruh naduh hyndai hynthai la peit la khmih da ka Raid Warmawsaw-Umsohbar ba hap ha ka Hima Nongspung bad ka long kaba sngewlyngngoh pat ba ka sorkar Assam ka wan tei beit thik thik ïa katei ka surok da kaba kam ba ka dei sha ka jylla Assam.
Na ka liang u President ka HANM, Western Ri Bhoi, u Bah Sumar Lyngdoh, u la ong ba ka seng ka pynpaw ïa ka jingpyrshah kaba jur ba na ka por sha ka por ka sorkar Assam ka wan ban kyntur pud sha u pud u sam ka jylla Meghalaya bad khamtam mynta ka sorkar Meghalaya bad ka sorkar Assam ki don hapdeng ka jingïapynbeit pud bad kumno pat ka sorkar Assam ka wan shna surok khlem ka jingtip lang ka sorkar Meghalaya, kynnoh utei u nongïalam ka HANM, Western Ri Bhoi.
U la ong ruh ba ka seng ha kane ka jingleit jurip halor katei ka jingwan shna surok ka Assam kum ka seng ruh ka la pynsangeh bad kam shah shuh ïa ki nongtrei ban shna ïa katei ka surok bad ha kajuh ka por ruh ka seng ka dawa na ka sorkar Meghalaya ba ka dei ban tuklar mardor ïa kane ka kam ba ka sorkar Assam kam dei ban wan kyntur pud ban wan rah ïa kita ki kam pynroi sha u pud u sam ka jylla Meghalaya, u la bynrap.
Shuh shuh, u la bynrap ruh da kaba ong, ba ka seng ka dawa jur ïa ka sorkar Meghalaya ba ka dei ban shim khia ban ïa kren halor kane ka bynta bad lada ka sorkar Meghalaya kam shim khia kum ka seng kam banse ban s him da kiwei ki lad ki lynti lada ka sorkar Assam ka dang pyntrei jubor ïa katei ka surok kaba hap sha u pud u sam ka jylla Meghalaya ba hap ha ka Raid Warmawsaw hapoh ka Hima Nongspung, u la bynrap shuh shuh.