Morocco, Nailur, 09: Palat 1000 ngut ki nongshong shnong jong ka ri Morroco ki la duhei ïa la ka jong ka jingim ha ka jingkhie u jumai uba jur haduh 6.8 Richter Scale ha ka por kumba 11 baje mynmiet sngi Thohdieng hadien 60 snem.
Une u jumai uba jur u la pynkhyllem ruh ïa ki ing ki sem bad ïa ki ïing mala ha sor Marrakech, ka sor kaba jan bha ïa ka thymmei kaba u jumai u la khie. Ha kane ka jingjia, la ïathuh ba ka jingïap briew ka la jia sha ki bynta ba shathie ka rilum jong kane ka ri.
Ka Interior Ministry ka la pyntip ba ki don 1,037 ngut ki briew kiba la ïap ha kane ka jingkhie u jumai bad 672 ngut kiwei pat ki la mynsaw jur.
Ha ka shnongAmizmiz, ki nongai jingïarap ki la ïarap ban weng ïa ki synrum da ki kti. Ki synrum na ka jingtwa jong ki ing ki sem ki la saphriang ha surok kaba khim. Shabar ka Hospital, kumba 10 tylli ki metïap la hap ban shu kli ha ka nep syaid ryngkat ka jingsynran lang jong ki bahaing hasem kiba la ïap pait dohnud.
“Haba nga ïohsngew ïa ka jingkhynñiuh ki kjat bad ka ing kaba la noh, nga la rah lang ïa ki khun shabar. Hynrei ki paramarjan kim shym la lait mih shabar,” ong u Mohamed Azaw. “Kaba sngewsih ka long ba ym shym la lap shuh mano mano ruh ban dang im hapoh ïing. U kpa bad u khun ki la ïap hadien bad mynta ki nongai jingïarap ki dang wad ïa ka kmie bad ïa ka khun.”
Ki paidbah ki la hap ban shu ieng laiñ ban ap ïa ki jingïarap marbam ha ki dukan.
Ki nongai jingïarap ki la ïakynduh mawsiang ruh na ka jingtwa ki synrum kiba la pakhang lynti ïa ka surok na Amizmiz sha kawei pat ka shnong kaba marjan.
Ïa kane ka jingkhynñiuh u jumai la ïohsngew ruh sha Huelva bad Jaen ha Andalusia ha ki bynta ba shathie jong ka ri Spain.
Ki Camera Footage la ïohring lyngba ki CCTV ha Marrakech ki la pyni ba ka khyndew ka la khynñiuh, bad ki briew ki la sdang ban mareh bad kynthih kat shaba lap bad kiwei pat ki la wad jaka rieh ban lait na ka jingshah tap ha ki synrum jong ki ing ba la twa.
Ha Marrakech, la pynthikna ba ki don 13 ngut ki briew kiba la ïap, katba kiwei pat ki la hap ban sah ha ki jaka kiba kham shngaiñ namar ka jingsheptieng ban leit phai sha la ing.
Ha dohnud jong ka nongbah barim, ka jaka ba la ithuh da ka UNESCO kum ka World Heritage Site, u Minaret jong ka Mosque ki la khyllem ha Jemaa al-Fna Square.
Ki briew kiba la mynsaw ki la shlei ha Marrakech bad wan ruh na kiwei kiwei ki jaka ban ïoh jingsumar.
Ha ka thaiñ Moulay Ibrahim kaba jngai 40 kilomitar na ka bynta ba shathie jong ka Marrakech ki don da ki dorjon ki ing kiba la khyllem.
Ha Montasir Itri, uwei u nongshogn shnong jong ka shnong kaba don hajan Asni ula ïathuh ba bun ki ing ki la julor.
“Ki paramarjan jong ngi ki la shah tap ha ki synrum bad haduh mynta ki nongai jingïarap ki dang wad ban pyllait im ïa kiba dang im,” ong uwei u rangbah.
U jumai uba jur uba la khie ha ka ri Morroco u la jia ha u snem 1960 ha kaba u la dkhat jubor kumba 12,000 hajar ngut ki briew, katkum ka U.S. Geological Survey.
Ha ka ri Turkey, u jumai uba jur u la khie ha u bnai Rymphang bad dkhat jubor palat 50,000 hajar ngut ki mynsiem briew.
Ka ri Algeria kaba la pyndkut noh ïa ka jingïadei bad ka ri Morocco ha u snem 2021 halor ki kynrum kynram saiñpyrthei jong ka Western Sahara, ka la pyntip ba kan plie na ka bynta ka jingpynher liengsuiñ kum ka jingïarap para briew bad ban phah ïa ki dawai dashin lyngba ki liengsuiñ.
