Shillong, Nailur 9 : Ka sorkar jylla lyngba ka tnad pule puthi ka la pan jingpynshai na ka Principal jongka skul ha West Jaintia Hills halor ka jingai jingbit bad shah ïa ki khynnah skul ban tem bad shad ïa ka jingrwai jong ka seng saiñ pyrthei ha ka jingïaleh kmen ha katei ka skul. Kane ka jingpan jingpynshai da ka tnad pule puthi ka dei hadien ba la don kiba ujor ïa ka Principal halor katei ka jingrwai.
Kane ka shithi na u Director ka School Education & Leteracy u Swapnil Timbe ka dei sha ka Principal jongka Government Girls Higher Secondary School, Jowai bad la ïoh pdiang da ka Principal ha ka 8 tarik mynta u bnai.
“ Ka shithi ka la pynpaw ba u Director hadien ba u la ïoh jingtip na ka jingdon kiba ujor ba la tem da ka jingrwai jongkawei ka seng saiñ pyrthei ( kaba kat kum ka jingtip ba la iïh da u nongthoh khubor ka dei ka jingrwai Prah) ha ka Sngi ba rakhe ïa ka Sngi Burom ïa ki Nonghikai ne ka Teacher’s Day ha ka skul jongphi ha kaba phi kum ka Principal jong kane ka skul phi la shah ne ai jingbit ïa ki khynnah skul ban tem ïa kane ka jingrwai kaba dei jong ka seng saiñ pyrthei kaba long pyrshah ïa ki rukom pynïaid ïa ki skul sorkar, kumta halor kane la bthah ïaphi ba phin ai ka jubab jingpynshai balei ban ym pynshitom ïa phi namar ka jingleh bym suidniew jongphi ïa ki kyndon ka sorkar”.
Kat kum ka khubor ba la ïoh da u nongthoh khubor kane ka jingrwai ka dei ka jingrwai Prah jong ka seng VPP kaba dei ka seng saiñ pyrthei kaba thymmai bad ïa kane ka jingrwai la tem ha katei ka sngi Rakhe ia ka Sngi Burom ki Nonghikai.
