Shillong, Nailur, 09: Da kaba buh hakhmat ïa ka thong ban ïakhun thma pyrshah ïa ka jingjyllei ka jingkhaii u drok ha ka ri baroh kawei, khamtam eh ha ka thain Shatei Lammihngi ka ri India, ka Directorate of Revenue Intelligence (DRI) Guwahati, Zonal Unit ka la ïoh kurup 47 kilo (4,70,000) ki dawai kuli Methamphetamine kiba shongdor palat T. 47 klur ha ka iew khaii tuh.
Arngut ki briew ki la shah kem bad shah pynngat hapoh ki kyndon jong ka NDPS Act 1985.
Katkum u kyrwoh ba la phah da ka Directorate of Revenue Intelligence (DRI) Guwahati sha ki lad pathai khubor ha ka sngi Saitjaiñ, la ïathuh, lyngba ka jingtip kaba bniah ba la ïoh na ki tnat syntiat, ki ophisar jong ka DRI, ryngkat ka jingsynran lang jong ki FGT ka BSF, Silchar Sector ha ka miet jong ka sngi Palei ki la ïoh bat ïa kawei ka trok kit dewbilat ha Digarkhal Toll Gate, Cachar District, Assam.
Ha ka jingkhynra ïa ka trok, la lap ïa ki 47 tylli ki song ba la thep 4,70,000 tylli ki dawai kuli Methamphetamine. Ïa une u drok la shalan tuh sha India na Myanmar lyngba ka khappud Indo-Myanmar shwa ban pynpoi sha kiwei kiwei pat ki jaka.
Haduh une u snem 2023, ka DRI ka la ïoh kurup palt 2800 kilo u drok Heroin, Methamphetamine bad Ganja ha kane ka thaiñ Shatei Lammihngi kiba shongdor palat T. 199 klur bad ïohkem haduh 28 ki briew kiba donkti ban khaii tuh ïa kine ki jingdih pynbuaid.
