Shillong, Nailur, 09: Ki shipai BSF Meghalaya ha ka sngi Thohdieng ki la ïoh ban pyllait im 96 tylli ki masi na khappud jong ka East Khasi Hills bad ka West Jaiñtia Hills ïa kiba la thmu ban khaii tuh sha ka ri Bangladesh.
Hadien ba la ïoh ïa ka jingtip kaba bniah na ki tnat syntiat, ki shipai BSF jong ka 4th bad ka 193rd Battalion ki la ïatreilang ban ïoh kurup ïa kine ki 96 masi hapoh 24 kynta katba ki snar khaii tuh ki dang thmu ban shalan be-aiñ sha ka ri Bangladesh.
Da ka jingpynibor jong ki shipai BSF ki runar ki la phet krad bad shim kabu ïa ka jingrben ka khlaw bad iehnoh shadien ïa ki masi.
Ha kawei pat ka jingkhynra, ki BSF jong ka 43rd Battalion kiba la ïoh ïa ka jingtip kaba bniah, da ka jingïatreilang bad ki Pulit ka Jylla Meghalaya, ki la ïohbat ïa kawei ka kali hajan ka shnong Rongra kaba don ha khappud, kaba kit ïa ka shini ba la thmu ban khaii tuh sha ka ri Bangladesh na ka South Garo Hills, Meghalaya.
Ki Pulit ki la kem noh ïa u nongñiah bad kurup ruh ïa ka kali namarba um shym la lah ban ïa ka jubab kaba biang ha kaba ïadei bad ka jingkit ïa ka shini.
