Shillong, Nailur 09 : Ka Khasi Author’s Society kan pynlong da ka lympung ïamir jingtip halor ka phang, “Ka Tip-kur Tip-kha ha u Khasi” kum shi bynta ka jingrakhe ïa ka sngi ka thoh ka pule (Literary Day) ha ka 11tarik mynta u bnai ha ka Laday Keane College, Shillong.
Ka jingpynlong ïa katei ka rynsan ïatai ka long shi bynta ka jingrakhe jong ka Society ïa ka lyngkhuh snem kaba 44 jong ka seng.
Katkum ka kyrwoh la ïathuh ruh ba ha katei ka sngi nalor ka jingdonlang u Chief Executive Member ka KHADC, Bah Pynïaid Sing Syiem kum u Kongsan yn ïoh ruh ïa ka jingpynshai na ki riewshemphang halor katei ka mat kaba kongsan bha kynthup naduh u President ka Society, Dr. DRL Nonglait.
Kan don ruh ka jingsam khusnam sha ki samla pule kiba ïoh heh ki mark ha ka sobjek kum ka dak ka jingpynshlur ïa ki.
Ha ka sienshong kaba ar pat kan don ka jingkren na ki riewshemphang kynthup naduh i Dr. (Sr) Philomena Kharakor halor ka phang, “Halor ka Longjait u Khasi” katba u Prof. Kynphamsing Nongkynrih pat un kren halor ka phang ka Tip-kur Tip-kha ha ka pyrkhat Khasi.
