Shillong Nailur 09: Ka kynhun jongki MDC ka Khasi Hills Autonomous District Council (KHADC) hapoh ka jingïalam jong u Bah Pynïaid Sing Syiem kum CEM, ki la hiar sha Goa ha ka sngi Thohdieng na ka bynta ban leit peit buit kumno katei ka jylla ka paw kum ka jylla kaba lah ban ïakhun ïa ki jakhlia bad ki jaboh jabaiñ kynthup naduh kiba pyut haduh ki bym pyut.
Ka kynhun ka la kynduh ruh markhmat ïa u Myntri Rangbah katei ka jylla, u Dr. Pramod Sawant ha ryngkat ka jingdonlang ki Myntri ka sorkar Goa kynthup ïa u Govind Gaude bad kiwei kiwei.
Lah ruh ban kdew hangne ba ka jylla Goa ka la paw ha kaba ka lah ban pynkylla sboh na ki jaboh jabain kiba mih naki iing ki sem bad don pat ki jait jakhlia ki bym pyut ka shna biang ïa ki khnang ba lah ban pyndonkam pat ha kawei ka liang.
Katei ka kynhun kaba leit peit bniah ha ka rukom pyntreikam ïa ka Solid Waste Management, ka kynthup ruh ïa u Chairman ka KHADC u Bah Lamphrang Blah, ki Executive Member (EM) kiba kynthup ïa u Bah Gigur Myrthong, Bah Victor Ranee, Bah Rangkynsai Kharbuki, Kong Macdalyn S Mawlong, Bah Teibor Pathaw, Bah Alvin Sawkmie, Bah Fantin Lakadong bad ruh u Bah Carness Sohshang.
Nalor kane la don lang ruh ki MDC kiba kynthup ïa u Bah Bajop Pyngrope, Bah Sherbor Mawlong bad ki heh ophisar jong ka KHADC.
