Nongpoh, Naiwieng 05: Ban dang pynkhlaiñ ïa ka jingshakri sha ki paidbah ha ka imlang ka sahlang katkum ka thong treikam jong ka Seng, ka Khasi Students Union, Nort Khasi Hills District Unit ha ka sngi Saitjaiñ ka la lah ban pynskhem ïa ki nongïalam ba pura jong ki 4 tylli ki shnat treikam ba hap hapoh ka thaiñ Byrnihat.
Kitei ki 4 tylli ki shnat treikam kiba ka seng KSU ka la ïoh ïa ban pynskhem da ki nongïalam ba thymmai ki kynthup ïaka KSU Byrnihat Circle, ka KSU Pahamlang Unit, KSU Killing Unit bad ka KSU Baridua Unit ha kaba kitei ki nongïalam bad ki la pynbam smai bad pynskhem da u General Secretary ka KSU Sengkmie, Usamla Donald Thabah.
Ha kane ka jingïalang pynskhem ïa kitei ki nongïalam na ka bynta ka samoi treikam jong u snem 2023-2027 la sakhi lang da ka jingdon lang u samla Biangbor L Paliar Vice President KSU Seng kmie, Samla Ferdinald Kharkamni, President KSU NKHD, Samla Baïashanlang Kharshanlor, Assistant Organising Secretary KSU NKHD lem bad kiwei kiwei ki nongïalam na ka District bad ka sengkmie.
Ki nongïalam ba la shah pynskhem bad pynbam smai ki kynthup ïa u Budlang Kharjahrin President KSU Killing Unit, Fullmoon Ranee President KSU Pahamlang Unit, Alexius Narleng, President KSU Baridua Unit, Alexandrio Kharkrang kum u President ka KSU Byrnihat circle lem bad kiwei kiwei ki nongïalam bad ki dkhot na kitei ki saw tylli ki shnat treikam.
Ha kane ka sngi kum u nongïalam ba hakhmat ka KSU na ka sengkmie, u Samla Donald Thabah, nalor ka jingshong bynta ban pynbam smai bad pynskhem ïa kitei ki Nongïalam u la ai ruh ki kyntien sneng ki kyntien kraw ïa kitei ki Nongïalam ba kim shim ïa kata ka lyngkor nongïalam ban ïada ïa ki paradoh ki parasnam khamtam ba kitei ki shnat treikam ki dei ha khappud ka Meghalaya bad Assam ba ngi donkam ban pynkhlaiñ bha ïa ki shipai ka jaid bynriew ban ïada kyrpang ïa la ki para jaidbynriew.
Shuh shuh, u la pynpaw ruh ba bun ki jaid bynriew jongngi ki shah thombor ha baroh ki liang ha ki shnoing khappud naduh ka jingpynibor ban kyntur ïa ki jaka puta bad khñiot ha ka kam khaïi pateng bad kiwei kiwei bad lada ngi don pat kita ki shipai ka jaid bynriew ka kamram jongki ka long ban ïada naduh ki kam kyntur pud ki kam kyntur sam bad ruh ka jingshah banbeiñ ki paradoh ki parasnam ha ki shnong khappud, u la bynrap.
