Jowai, Naiwieng 05: Ka Rotary Club Jowai hadien ba la ïoh ïa ki nongkitkam ba thymmai naka bynta ka samoi trikam jong ka snem 2023-24 hapoh ka jingïalamkhmat jong u Rtn. Deibormi Toi kum u President bad u Rtn. J.M. Pohsngapkam kum u Secretary.
Na ka liang u Rtn. Nilesh Kumar Agarwal, District Governor RID-3240 ha kane hi ka sngi ula wan hiar sha Jowai ban ïa kynduh khnang ïa ki dkhot jong ka Rotary, halor ka nongrim ban ïakren ïa ki kam ba bha kiba ka Rotary ka ju leh naka por sha ka por bad kumjuh shaphang ki rukom treikam jong ka Rotary International.
Ïa kane ka jingïalang la pynlong ha Infinity Conference Hall, Mooralong, Jowai ha kaba u Rtn. D.F. Majaw (PHF) ula long kum u Master of ceremony, la don ruh ka jingrwai ïa National Anthem bad ka jingkren pdiang na u Rtn. Rudolf E. Laloo (PHF) RC-Jowai, la ïoh ruh ka jingkren ai mynsiem na u District Asst. Governor, ka jingpule lyngkot shaphang u Rtn. Nilesh Kumar Agarwal da u Rtn. Montri Passah, Past President RC-Jowai.
U Rtn. Deibormi Toi, President Rotary Club Jowai haba ai jingkren ha kane ka jingïalang ula pynsngew ïa ki mat bad ka thong treikam jong ka Rotary International kiba la dep shong pyrkhat sani bha da ka Rotary International kiba kynthup ïa ka Community Service, Environment, Education, Health, Sanitation bad kiwei kiwei de kiba ïadei bad ka jingbha jingmiat haka imlang ka sahlang jong ki briew kiba don haki shnong ki thaw.
Na ka liang ki dkhot ka Rotary Club Jowai kila ïoh lad ban ïa phylliew jingmut lang shaphang ki kam jong ka Club kiba dei ban trei bha ha kine ki sngi ban wan katkum ka rukom jong ka Rotary International.
U Rtn. Nilesh Kumar Agarwal, District Governor, RID -3240 ha ka jingkren ula pynpaw ka jingsngewnguh bad ka jingsngew burom kaba khraw ïa ka Rotary Club Jowai, uba la kyntu kynpham ïa ki dkhot ka Rotary Club Jowai ba kin don ka mynsiem jingïatreilang bad sngew trai ïa ka kam kum ki dkhot khnang ba yn lah ban pynïaid shakhmat ïa ki kam babha jong ka seng hapoh ka imlang sahlang naduh ka pule puthi, ka koit ka khiah, ka jingpynneh pynsah ïa ka mariang bad ka jingitynnad jong ki sawdong sawkun ka mei rangew. U la ong ba ka jingkhot jingïalang na ka por sha ka por ka long kaba donkam eh bad ka jingdon bynta lang ha kino kino ki prokram jong ka Rotary Club kan ïarap ban shemphang shuh shuh halor ki rukom treikam kiba long katkum ka juk bad ka por ba mynta. Katba ïa ki kyntien ai khublei la ïoh na u Rtn. J.M. Pohsngap, Secretary Rotary Club Jowai.
