Shillong, Risaw 17: Ki jingïakhun jong ka lympung SSA SRGT 3rd DIVISION Football League 2023 kiba la long hynne ka Sngi Hat Majai (17 tarik Risaw, 2023) ha madan 1st Ground SSA Stadium.
Haba phai sha ka jingïakhun kaba nyngkong kaba la sdang ha ka por 11 baje mynsngi ha 1st Ground SSA Stadium, ka kynhun ïalehkai jong ka Mawpat SC ka la khur ïa ka namjop hadien ba pynliem da 2-1 kol ïa ka Sanmer SC.
Ka Sanmer SC ka la ïoh ban thep ïa ka shi kol na u Banshan Dhar ha ka 34 minit, hynrei ki ar kol na u Batip Bamon (27 & 47 minit) ka la biang pura ïa ka Mawpat SC ban khur shalade ïa ka namjop.
Ka jingïakhun kaba la sdang ha ka por 1 baje mynsngi ha SSA Stadium, ka Mylliem Lum SC ka la khur ïa ka namjop kaba suk da kaba pynbam 4 – 1 kol ïa ka Lamparing SC.
Ka Mylliem Lum SC ka la sdang pynkhihjar tang hadien 10 minit ba la ïaid ka por na u Lesterwell khriem, katba ka namtam ka long sha u Eliastar Nongsiej u ba la ïoh ban khyrwit da ka hat trick (25, 39 & 64 minit).
Na ka liang jong ka Lumparing SC ka la ïoh ban pynphai ïa kane ka shi kol na u Gillbert Nongneng ha ka 41 minit.
Ha ka jingïakhun kaba lai kaba la sdang ha ka por 3 nohphaisngi ha madan 1st Ground SSA Stadium, ka PFR FA ka la pynliem ïa ka Mawryngkneng SC da 2 kol.
ïa kine ki ar kol jong ka PFR FA la thep da u Adelbert Khongshun ha ka minit kaba 10 bad na u Thymmaibor Mukhim ha ka minit 71.
Ki jingïalehkai mynta ka sngi Balang, yn sdang biang naduh ka por 11 baje, ha 1st Ground SSA Stadium, ka Nongumlong SC pyrshah ïa ka Lumdiengjri SC. Nangta ha ka por 1 baje ha madan SSA Stadium, ka Lawmali Pyllun SC pyrshah ïa ka Rynjah SC, bad khadduh por 3 baje ha 1st Ground SSA Stadium, ka Lapalang SC pyrshah ïa ka Gorkha Association.
