Shillong, Risaw 16 : Ki nongïalam jong ka Khasi Author’s Society (KAS) ha ka sngi Nyngkong ki la kynduh ïa u Myntri Rangbah ka Jylla, Conrad K Sangma ban dawa ba dei ban ai jingithuh noh ïa ka Ktien Khasi kum ka Official Language lane ka Ktien Sorkar ha ka jylla.
Haba kren bad ki lad pathai khubor, u President ka KAS, Dr. DRL Nonglait u la ïathuh ruh ba haduh mynta ka Ktien Khasi ka dang dei tang ka Associate Official Language bad kumta ki kwah ban kyntiew noh ïa ka kum ka Official Language.
“Katkum ka Meghalaya Language Act la ïathuh ïa ka ktien Khasi bad Garo kum ki associate official language, kumta na ka liang ka KAS ka thrang ban ai jingithuh noh ïa ka Ktien Khasi sha ka ktien Sorkar hapoh ka jylla,” u la ong da kaba bynrap ruh ba kam don satia ka jingkhang ban don bun tylli ki official language ha ka jylla.
U President ka KAS u la ong ruh ba haduh mynta ka ktien sorkar ha ka jylla kadei ka ktien English bad dei na kane ka daw ki kwah ba ka sorkar kan shimkhia ïa kane ka kam.
Halor ka jingkylli, u Dr. Nonglait u la ïathuh ruh ba u Myntri Rangbah u la kular ban peit bniah ïa kitei ki jingdawa ba ki wanrah bad ong ruh ba un bthah ïa ka tnad ba dei peit ba kan leh ïa kaba donkam.
Na ka liang ka KAS ka la kyntu ruh ïa u Myntri Rangbah ba un buddien ïa ka jingdawa ban pynrung noh ïa ka Ktien Khasi ha ka Khyrnit kaba Phra jong ka Riti Synshar jong ka Ri na ka tnad Kampohiing ka jylla.
