Shillong, Naitung, 25: Ka Hynñiewtrep Youths Council (HYC) ha ka sngi Palei ka la phah da ka shithi pynkynmaw sha u Symbud Myntri Rangbah ka Jylla u Bah Prestone Tynsong uba dei ruh u Chairman jong ka High Level Committee bad ban pan jingpynshai halor ka jubab Right to Information (RTI) ba la aiti da ka ophis jong ka Shillong Municipal Board (SMB) sha ka seng ha kaba ïadei bad ka jingthmu ban pynkynriah ïa ki longïing kiba sah ha Them Iewmawlong.
Ha ka shithi ba la soi da u President u Bah Roy Kupar Synrem, ka seng ka la pynkynmaw ba ka la pyrshah ïa ka jingthmu ban pynkynriah ïa baroh 342 tylli ki longiing na Them Iewmawlong.
“Katkum ka jubab hok wad jingtip (RTI) ba la ïoh pdiang na ka ophis jong ka Shillong Municipal Board (SMB) , ki don tang 194 tylli ki longing kiba don ïa ki bahaing hasem kiba trei hapoh ka Municipal bad ha kiwei kiwei ki tnat treikam ka Sorkar Jylla bad kumba 148 tylli ki longïing ki dei ki bym don satia ïa ki bahaïing hasem ki ban trei ha Municipal bad ha kiwei kiwei ki tnat treikam ka Sorkar,” la ong ka HYC.
“Katkum ka shithi ba la kdew haneng, phi la bthah ïa u Director jong Urban Affairs bad ïa u Chief Executive Officer jong ka Shillong Municipal Board (SMB) ban peit bniah bad ban pynshisha ïa ka jubab RTI jong ka Municipal ba la ai sha ngi,” la bynrap ka Seng.
“Namarkata, ngi kyrpad ïa phi ban sngewbha ban bthah ïa ka ophis u Director jong ka Urban Affairs bad u Chief Executive Officer (CEO) jong ka Shillong Municipal Board (SMB) ban ai lem ïa ka kopi jingpynshai sha ngi kum ka jingpyntip,” la ong shuh shuh u kyrwoh.
