333 ngut ki nongpang TB ha Ri-Bhoi, 254 kiba dang shah sumar, 98 ngut ki ban ïoh jingïarap lyngba ka PMTBMBA

Nongpoh, Nailur 22: Ka ophis u District Medical and Health Officer, haka jingïatreilang bad ka District Tuberculosis Officer, Ri-Bhoi District mynta ka sngi kala rakhe ïaka jingdap 1 snem jong ka Pradhan Mantri TB Mukt Bharat Abhiyaan (PMTBMBA) ha Science Hall Nongpoh.
Kum ban shu pynpaw ba ïa katei ka prokram Pradhan Mantri TB Mukt Bharat Abhiyaan (PMTBMBA) la plie padibah ïaka da ka President jong ka Ri India ka Drupadu Murmu haka 9 tarik Nailar 2022 kaba dei ka thong jong ka sorkar kmie bala wanrah shakhmat naka bynta ban ïarap ïa kiba pang TB bad khamtam ba ki nongshong shnong ka Ri India kin don bynta lang naduh ki nongmihkhmat, ki ophisar, ki seng bapher bapher, ki nongbei pisa sha kito kiba ioh ïa katei ka jingpang ha kaba ïadei bad ka bam ka dih ka jong ki haduh 6 bnai lynter ba kin ioh ban bam ki jingbam kiba kham bha haka por ba ki shah sumar bad dih dawai.
Ha katei ka sngi u Manis Kumar Assistant Deputy Commissioner ka Ri-Bhoi u la wan ban shim bynta kum u kongsan haka jingdonlang u Dr. P Kharnary Asst. Medical Superintendent ka MIMHANS, ka Dr.TS Momin DMHO ka Ri-Bhoi, ka Dr. E Kalwing District Tuberculosis Officer bad kiwei kiwei ki ophisar bad doctor naka tnad ka koit ka khiah.
Ha katei ka sngi naka liang ka ophis u DMHO kala pynkup burom ruh ïakito ki briew kiba la don bynta ban ïarap bad ban tingkhun ïaki nongpang TB ha kaba ïadei bad ka bam ka dih kaba ki donkam haka por ba ki dang hap ban shah sumar bad dih dawai, bad kumjuh ruh la sam ruh ïaki marbam mardih sha kito ki nongpang TB kiba la shah tingkhun bad don kumba 22 ngut ha katei ka sngi.
Haba kren ha katei ka sngi naka liang ka Dr E Kalwing District Tuberculosis Officer ka Ri-Bhoi kala pyntip ba haduh mynta ki don kumba 333 ngut ki ki nongpang TB ha Ri-Bhoi bad kumba 254 ngut ki dang don hapdeng ka jingshah sumar bad napeng kitei ki nongpang baroh tang 98 ngut kiba la shah tingkhun haki riew shimet, ki nongmihkhmat kiba la shim sngewbha ban peit bad khmih ïaki halor ki jingdonkam jong ki naduh ka bam ka dih namar kitei ki nongpang ki donkam ïaki jingbam kiba tei haka por ba ki shah sumar bad hap ban dih dawai ba katei ka jingpang kan jah naka met jong ki bad kiba sah bun naki longiing ba duk ba rangli ki shem jingeh ban ioh ïaka bam kaba thikna, bad dei halor katei ka nongrim ba ka sorkar kala pynmih ïa katei ka prokram ba ki paidbah bad kynhun kiba kwah ban ïarap ïaki nongpang TB lyngba ka PMTBMBA da kaba kin register ïalade lyngba ka Nikshay Mitra khnang ba ka sorkar kan sa lah pat ban pynpoi sha kito ki ioh ïa katei ka jingpang bad kiba dang don hapdeng ka jingshah sumar.
Shuh shuh kala pyntip ruh ba ka sorkar kala buh thong ban pynduhjait noh ïaka jingpang TB shuwa u snem 2025 bad halor katei ka nongrim kala buh ka jingkyrpad sha baroh ki kynhun bapher bapher, ki nongmihkhmat paidbah, ki riew shimet ba kin ting khun lane ban ïarap ïakitei ki nongpang TB khnang baa k sorkar kan lah ban pynduhjait ïa katei ka jingpang kumba la angnud.
Shuh shuh naka liang ka Dr Kalwing kala wer ruh ïa ki paidbah kiba don ïa katei ka jingpang ba kim dei ban lehraiñ hynrei ban mih shakhmat haba ki don ïaki dak ki shin namar ka jingma ka jingpang TB ka lah ban ktah ïaka koit ka khiah jong u briew lada kim leit phah sumar haka por kaba biang bad pyntip ruh sha ki paidbah halor ki dak ki shin jong ka jingpang TB ba kynthup naduh ka jing jyrhoh balah ruh ban mih snam kumba neh palat ïaka 2 taiew, ka jingkhluid ka met, ka jinghiar kilo bad ka syep haka por mynmiet bad kiwei kiwei ba kim dei ban kheiñ sting hynrei ban leit sha ki jaka sumar ba hajan jong ki ban phah peit bad khmih khlem lut pisa.
Na ka liang u Manish Kumar ADC ka Ri-Bhoi haba kren ha katei ka sngi kum u kongsan u la pynpaw ba ka jingïatreilang ka long kaba kongsan ban pynduhjait ïa katei ka jingpang kumba la buh thong da ka sorkar bad kyrpad ruh ïa baroh kiba kwah ban mih shakhmat ban ïarap ïakitei ki nongpang TB khang ba ka jingthmu bad ka jinganud ka sorkar ban pynduhjait ïa katei ka jingpang kan poi sha ka thong.