Kyntu u National President ka BJP Kisan Morcha ba dei ban pyntreikam hok ïa ki skhim ki nongrep ha Meghalaya

Nongpoh, Kyllalyngkot 11: U General Secretary ka BJP Kisan Mocha, u Rajkumar Chahar mynta ka sngi u la wan ban iuh kjat ha Umbuda, Nongpoh na ka bynta ban ïa kynduh ïa ki Nongïalam ka BJP bad kumjuh ruh shibun ki seng nongrep na ka bynta ban ai mynsiem ïa ki nongrep bad shi bynta ban dang pynkhlaiñ ruh ïa ka BJP party ha Nongpoh Constiteuncy.
Une nongïalam ka BJP ba dei peit ïa ka kam rep kam riang u la wan ban iuh kjat ha Umbuda ban ïa kynduh lang ïa ki nongïalam ka BJP Kisan Morcha bad kynthup ruh ki seng nongrep na Ri Bhoi ban ïa kren ruh halor ka kam rep ka kam riang ba ka bJP ka don ïa kata ka thong ban kyntiew ïa ka kam rep ka kam riang bad khamtam ban kyntiew ïa ka ioh ïa ka kot jong ki nongrep ha Ri Bhoi District bad ha ka jylla hi baroh kawei.
Haba wan ban iuh kjat ha Umbuda, Nongpoh, ïa u National President ka BJP Kisan Morcha la synran lang ruh da ka jingdon lang u National General Secretary ka BJP Kisan Morcha bad ryngkat ka jingdon lang naduh u President ka State BJP Kisan Morchah, u Bah Justice Syiem, u District President ka BJP Ri Bhoi, u Bah Sen Thabah bad u Bah Sumarlang Swer bad la don ryngkat lang ruh u Bah C.B Syiem uba dang shu wan ban pynïasoh sha ka party BJP ha Nongpoh Constituency.
Ha kane ka jingwan iuhkjat une u nongïalam BJP ba dei peit ïa kam rep, la wan ban shim bynta ruh da ki seng nongrep bapher bapher na Ri Bhoi bad kynthup ki nongrep kiba la ioh lad ban pynsngew ïa ki jingeh ki nongrep b aune u nongïalam un ïa kren sha ka sorkar kmie ba la lamkhmat da ka party BJP hapoh ka ri.
Haba ai jingkren ha ka jingïalang mynta ka step ha Umbuda, u National President ka BJP Kisan Morcha, u Rajkumar Chahar, u la ong ba u angnud ban ioh lad ban wan ïa kynduh ïa ki nongrep ka Ri Bhoi bad ka jylla Meghalaya hi baroh kawei bad kane ka jingwan jngoh jong u ïa ka jylla Meghalaya ka dei ruh shi bynta ban ioh sngew ïa ki jingeh jong ki nongrep ha kaba ka sorkar BJP ka don ïa ka thong ban kyntiew kyrpang ïa ki nongrep.
U la ïathuh ruh ba ka sorkar BJP na ka sorkar kmie ka la pyntreikam shibun ki skhim na ka bynta ki nongrep ha ki jylla bapher bapher ka ri India bad ka party BJP ka kwah ba ki skhim ba la pyntreikam da ka party ka dei ban treikam bad ki nongrep ki dei ban ioh jingmyntoi lyngba kitei ki skhim ba ka sorkar BJP ka la pyntreikam ban kyntiew kyrpang ïa ki nongrep hapoh ka ri.
Shuh shuh, u la ong ruh ba kum u nongïalam ka BJP ba peit kyrpang ïa ki nongrep u kwah ba ki skhim ba la wan rah ha ka jylla Meghalaya kiba dei na ka bynta ki nongrep ki dei ban urlong bad dei ban pyntreikam na ka bynta ki nongrep, namar ka BJP ka dei ka party kaba burom ïa ki nongrep kiba long ki paia baskhem ban kyrshan ïa ka bam ka dih ki paidbah bad kumjuh ruh wat ban kyntiew ïa ka ioh ka kot jong ka ri India hi baroh kawei lyngba ka kam rep ka kam riang, u la bynrap.