Khliehriat kyllalyngkot 11: U bah Aibok Phawa, u la plie paidbah ïa ka Rizwan Hotel bad Restaurant ha Khliehriat East, ïa kane ka hotel la long trai da u bah Hamris Pakem, ha kane ka hotel ka don ruh ka conference hall kaba bit ba biang bha na ka bynta kano kano ka jingialang bad kane ka hotel ka don hapdeng jong ka sorbah Khliehriat bad kan pynsuk haduh katta katta ïa ki nongleit nongwan kiba donkam ïa ki jaka sah miet bad ka bam.
Haba kren ha ka jingïalang ba la pynlong ha ka conference hall, u bah Aibok Phawa, u la ong ba kane ka jingplie ïa kane ka hotel kan long kawei na ki lad ban pynioh kam iohjam ïa ki nongshong shnong, kumjuh ruh kane kan pynsuk ïa ki nongleit nongwan kiba donkam ka jaka ban sah miet, u la ong ruh ba “Ka Khliehriat kan sa long kawei na ki jaka ba paw nam ha ki liang baroh ym dei ba ka paw nam tang ha u dewïong, hynrei kan sa pawnam ruh ha ka jingdon ki khlaw ki btap, ki lum ki wah, kumta ym dei ban duh jingkyrmen namar ka lawei jong ki khun ki kti ka dang don shakhmat, kumta kane ka jingsdang ïa kane ka hotel ka long kawei kaba ki lah ban pyndonkam bad kamai ha la lawei”, u la ai ruh ka jingiaroh ïa ka jingitynnad kane ka hotel kaba la bit la biang bha na ka bynta kito kiba wan ban sah, kiba wan donkam sha kine ki thaiñ East Jaiñtia Hills District.
U bah Hamris Pakem, u la pynpaw ka jingsngew nguh ïa u Blei, uba la ai kane ka lad ban plie ïa kane ka hotel bad ong ruh ba kane ka long ka jingjop ïa u, kumjuh ruh ka iïng ka sem, ka shnong ka thaw. U la pynpaw ruh ba u don ka jingthmu ban kyntiew ïa ka thaiñ bad ïa ka jylla hi baroh kawei bad ong ruh ba mynta u dang ap ban thep kam ïa ki briew kiba na ka thaiñ na Khliehriat East bad Khliehriat West kito kiba la pyndep ïa ka jingpule ha kane ka bynta ba ïadei bad ki hotel, ki restaurant.
