Jowai, Risaw 27: Ka lympung ïalehkai phutbol jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha madan Kiang Nangbah Stadium, Dongmihsngi Jowai.
Ïa kane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun mynta ka sngi ka kynhun ïalehkai jong ka Nangbah Iawmusiang SC kala lah ban pynliem da 3-0 kol ïa ka Chilliangraij SC, ïa kitei ki kol na ka Nangbah Iawmusiang SC la thep ar kol da u Dlessing Lyngdoh ha ka minit ba 21 & 88, u Sowanmiki Thubru ha ka minit ba 90+1. Hynrei na ka liang ka Chilliangraij SC kam shem la ïoh ban thep wat tang kawei ka kol ruh, ka jingïakhun hapdeng kine ki kynhun kala kut noh da 3-0 kol.
Ka jingïalehkai lashai ka sngi 28 tarik kan long hadpeng ka Sailung Ïalong SC pyrshah ïa ka Dulong SC ha ka por 2 baje shiteng nohphai sngi.
