Shillong, Risaw 07: Hadien ar tylli ki snem ba ka la duh ïa ka burom, ka Mawlai ka la wanphai biang kum ka lahduh jong ka Shillong Premier League 2026 hadien ba ka la pynliem noh ïa ka Rangdajied United da 5-0 kol hynne ka sngi Balang ha SSA Stadium.
Watla ki dang don sa saw tylli ki jingïalehkai ban pyndep na ka bynta kiwei pat ki kynhun, hynrei kane ka dei ka jingïalehkai kaba khatduh jong ka Mawlai bad mynta kala ïoh ban kamai 21 poiñ ban pynskhem ïa ka jingjop.
Ka Mawlai ka la lamkhmat lypa da 3-0 tang ha ka kylla step lyngba ki kol na u Basuklang Bina (13’), u Arkini Laloo (16’) bad u Fairming Suting (22’) bad ka la bynrap sa ar tylli ki kol lyngba u Damanbhalang Chyne (83’) bad u Ricky Chyne (90’) ban pynthikna ïa ki lai point khlem jingartatien.
Ka Mawlai ka la jam shakhmat khlem shah rem ha baroh kawei ka samoi, da kaba jop hynriew tylli ki jingïalehkai bad ïakhaid lai sien. Kadei ruh ka kynhun kaba shah thep duna na baroh – da tang 2 tylli ki kol ba ki liang pyrshah ki la ïoh lad ban thep – katba ka la thep pat 17 kol. Ka la lamkhmat ha kawei pa kawei na ki khyndai tylli ki Round jong ka SPL 2026 lait noh tang ar tylli ha kaba ka Langsning kaba la jop ha u snem 2025, ka la ïohlad ban ïalam ha khlieh duh.
Hadien ba ka la rah ïa ka SPL ha u snem 2022 bad 2023, ka Mawlai ka la ïoh ïa ka lad ban jop biang ïa ki ar tylli ki sienjam kiba bud hynrei ka la pynsyrwa da kaba hiar point ha ki jingïalehkai ba kut jong ka samoi. Kumta ka jingdawa ka la long kaba jur ïa ka Mawlai hynne ka sngi hynrei ki la lah ban ïalehkai bha bad khur ïa ka jingjop kaba kongsan.
Ka Rangdajied, kaba wan ha ka kyrdan ba hynriew, ka la pynshong ben ïa ki katto katne ki rangïalehkai ba kongsan jong ka kynhun ba sdang, watla ki don pat katto katne kiba ka la sei madan ha ka kylla miet. Ka jingduna ka jingshemphang na ki rangïalehkai ka RUFC ka paw shai naduh kaba sdang, ha kaba ka Mawlai ka la tehlakam ïa ka jingïalehkai da ka rukom pashat bol kaba stet.
Ka la shimpor tang 13 minit ïa ka Mawlai ban pynkhih ïa ka kol lamkhmat, kaba la wan na ka jingpyrshang kaba jam na u Basuk, bad ka bol ka la ïaid lait ïa u rangapdien u Mebatskhem L Lyngkhoi bad u nongap kol u Rangdajied Pathaw.
U Robertson Khongriah, watla um shym la ïoh ban pynkhihjar hynrei u la pynbit pynbiang ïa ar tylli ki bol pashat ba thikna na ka bynta ki paralok ban thep kol, kaba nyngkong na ka free-kick kaba la thep pat da u Arkini. Nangta ka Mawlai ka la pynjlan ïa ka kol lamkhmat sha ka 3-0 lyngba u Fairming shuwa ban jam sha ka por shongthait.
Ka kylla miet ka la ïaid khlem kol shi slem tad ynda la jam sha ki minit ba khatduh, ha kaba ka Mawlai ka la pynkhraw shuh shuh ïa ka kol lamkhmat da ar tylli ki kol na u Damanbhalang bad u Ricky.
Da kane ka namjop ka Mawlai ka la ïoh ban rakhe ïa ka khusnam lahduh kaba lai ha ka SPL, kaba dei ka sien kaba ar hapoh ka jingïalam jong u coach bah Hering Shangpliang.
Hadien ba la put pynwai ki nongïalehkai, ki nongkitkam bad ki nongkyrshan ka Mawlai ki la ïakmen lang ha madan hynrei kin ïoh ban rah ïa ka trophy tang hadien ba la kut pura ka samoi ïalehkai. Watla ladep thikna ïa ka kynhun ba rah ïa ka nam lahduh, hynrei ki dang don pat kiwei ki jingïakhun kiba jur ba dang sah na ka bynta kiwei pat ki kyrdan; ki kynhun ba pyndep ha ka thup kyrdan Top 6 kin ïohrung sha ka SSA Super Cup ban bud hadien ka SPL, kumta ka jingïakhun ka dang long kaba jur bha.
Mynta ka sngi kan dei ka jingïalehkai ba khatduh na ka bynta ka Sawmer kaba wan ha ka kyrdan ba hynñiew, ban aireng pyrshah ïa ka Mylliem, kaba wan sha trai duh ha ka por 3 baje nohphai sngi.
Ka Mylliem kan ïalehkai tang ban pyndep rukom namar ka la dep ban pynthikna ba kan pynkut ïa ka samoi ha ka thup kyrdan ban shah weng lane ka relegation zone. Hynrei ka Sawmer kan kiew sha ka kyrdan ba san lada kan jop mynta ka sngi.
