Wan ïuh kjat u Rector Major ka jingïasyllok Don Bosco ha Nongpoh Parish, shuwa ka rakhe ïa ka centenary ha Shillong
Nongpoh, Risaw 27: Ha ka sien kaba ar u Rector Major ka seng Salesians of Don Bosco u la wan ban iuh kjat mynta ka sngi ha Nongpoh parish kaba dei kawei na ka Parish bad ki skul ba la pynïaid da ka jingïasyllok ki Salesians of Don Bosco shuwa ban rakhe ïa ka jingdap 100 snem (Centenary Celebration) ba ki Seng Salesians of Don Bosco ki la wan ban poi ha ka thaiñ shatei Lam Mihngi ka ri India naduh u snem 1922 ba mynta kane ka seng ki Salesians ki la kynjoh sha ka jingïaid lynti ba 100 snem.
Kum ban pynkynmaw, ka kynhun seng ki Salesian of Don Bosco kin rakhe ïa ka centenary ka jingdap 100 snem ba la poi sha ka jylla shatei Lam Mihngi ka ri India ha ka 30 tarik u Risaw, 2022 ha Cathedral Parish, Laitumkhrah ha Nongbah Shillong.
U Rector Major ka Seng Salesians of Don Bosco, u Rev. Fr. Angel Fernandez Artime u la wan ban iuh kjat mynta ka step ha Parish Nongpoh shuwa ba un leit sha Nongbah Shillong ban shim bynta ha ka jingrakhe dap 100 snem ka seng Salesian of Don Bosco ka ban long ha Nongbah Shillong.
La pdiang burom ruh ïa u da u Phadar rangbah ka Nongpoh Parish, u Fr. Peter Syiemlieh bad la don ryngkat ruh u Fr. Paul Olphindro Lyngkot, uba dei u Provincial ka Shillong Province, ki phadar, ki sister bad ki nongïalam niam bad kynthup ruh ki khynnah skul bad ki khynnah skul barim ka St. Paul’s Higher Secondary School, Nongpoh.
Haba kren ruh ha kane ka sngi, u Major Rector ka Seng Salesians of Don Bosco, u Rev. Fr. Angel Fenandez Artime, u la ong ba ka jingwan iuh kjat jong u mynta ka sngi ha Nongpoh Parish ha ka sien kaba ar ka long shi bynta ban ai mynsiem ïa kane ka Parish bad ruh ki skul kiba pynïaid da ki phadar Salesian ba mynta kin rakhe ïa ka jingdap 100 snem ba la wan poi ka seng Salesians of Don Bosco ha ka jylla Shatei Lam Mihngi ka ri India.
U la ong ruh ba u wan ban iuh kjat ha kane ka Parish ka long shi bynta ban ai jingkmen bad ka jingkyrkhu kyrdoh naduh ki phadar, ki sister, ki nonghikai, ki nongïalam niam ba kin dang bteng ïa ka jingshakri ha ka shatri jong ki seng Salesians of Don Bosco la ka long ha ka balang, ha ki skul bad kiwei kiwei ki kam kiba dei na ka bynta ban tei ïa ka imlang ka sahlang.
Shuh shuh, u la ong ba u kwah ruh ban ai mynsiem khamtam ïa ki khynnah skul jong ki skul ba pynïaid da ka seng Salesians of Don Bosco ba kin don ïa ka thong ha ka jingim ban long kita ki khun jong u Blei bad ki Nongshong shnong kiba don ka jingkitkhlieh ban kyntiew ïa ka imlang ka sahlang kumba ki Missionary jong ka seng Salesians of Don Bosco ki la wan sha kane ka jylla da ka jingthmu ban kyntiew ïa ka jingim ba kynja mynsiem bad ruh ha ka liang ka bha ka miat bad ka roi ka par jong ki paidbah hapoh ka jylla, u la bynrap.