Hapdeng ka jingiphuh iphieng pynkut noh ka skul Auxilium HSS ïaka taiew lehkmen ki khynnah

0

Nongpoh, Risaw 27: Ka skul Auxilium Higher Secondary School, Mawtnum mynta ka sngi hapdeng ka jingiphuh iphieng kala pynkut noh ïaka taiew lehkmen ki khynnah skul hadien ba ki khynnah kila ioh ban lehkmen bad ban shimbynta shitrhem haki prokram bad ki jingïakop bapher bapher naduh ka sngi sdang.
Ïa katei ka taiew lehkmen ki khynnah skul la wan ban pynhap pyrda noh da u Bah Jason S Mawlong MLA ka Umsning kum u kongsan haka jingdon lang ka Sr. Bashisha Massar Principal ka Auxilium Higher Secondary School, ki kmie ki kpa, ki nonghikai bad khynnah skul bad kiwei kiwei ki riew rangbah.
Naka liang ki khynnah skul kila ioh ruh ban pyni ïaki jingshad bad jing rwai ban pynphuh pynphieng ïa katei ka prokram, ryngkat ki jingpyni riam bala shim bynta da ki heprit jong katei ka skul.
Naka liang ka Sr. Bashisha Massar Principal jong katei ka skul kala ïathuh ba katei ka prokram kala ai jingkmen ïa kiba bun ki khynnah pule jong katei ka skul hadien ba kila ioh ban shim bynta haki prokram bapher bapher baroh shitaiew lynter, kaba long ruh kum ka jingpynpyngad jabieng bad ki jingmut jingpyrkhat jong ki khynnah nalor ka pule kaba ki pynlut por haki kamra klas.
Haba kren ha katei ka sngi naka liang u Bah Jason S Mawlong u la pynpaw ka jingsngewkmen ban sakhi ïa katei ka sngi lehkmen jong ki khynnah nalor ka pule puthi ba ki pynlut por haki saw kynroh jong ki kamra klas, ba kin ioh ruh ban sei ïaka sap ka phong ka ba ki don namar nalor ka pule puthi ki khynnah ki donkam ruh ban tip ïaka sap kaba ki don.
U la ong ruh ba ki khynnah ki long ka lawei jong ka dong bad ka thaiñ, da kaba ai jingïaroh ruh ki khynnah pule ha katei ka skul kim duna shuh bad ki skul ba don sha ki ja ka sor, ha kaba ki khynnah ki shlur ban mih shakhmat ban shimbynta haki prokram bapher bapher wat haka rta ba dang rit.
Lyngba katei ka sngi naka liang u MLA u la ai mynsiem ruh ïaki kmie ki kpa ba kin long ki nongprat lynti ïala ki jong ki khun ba kin hikai haka lynti kaba dei khnang ba kin long ki khlur ba tyngshaiñ haka jingim jong ki.

Leave A Reply

Your email address will not be published.