Khliehriat Risaw 27: Ki nongïalam bad ki dkhot jong ka Khasi Students Union Wapung Unit hynnin ka sngi ki la leit ban buh da ka jingthoh ha khmat u Deputy Commissioner ka East Jaiñtia Hills District ban bud dien ïa ka jingdawa ka seng kaba la dawa na ka tnat bor ding ban pynioh machine transformer ha shnong Wapung bad ruh ban buh noh kawei ka Sub Station ha shnong Wapung.
Na ka liang ki nongïalam jong ka KSU Wapung, ki la ïathuh bad pynpaw ha khmat u Deputy Commissioner ba ki paidbah nongshong shnong jong ka shnong Wapung Skur bad Wapung Shnong ki ïakynduh jingeh haduh katta katta ha kaba ïadei bad ka rukom ïoh bor ding ha shnong namar ka jingduna palat ka bor ding (voltage) ha kaba ki paidbah ki kynduh jingeh ha ba ki pyndonkam ïa kino kino ki tiar ne ki machine kiba hap ban pynïaid da ka bor ding electrict bad kane ka jia khamtam eh ha ka dong Moopynieïñ ha Wapungskur.
Katkum ka shithi ba la buh ha khmat u Deputy Commissioner ba la soi da u President KSU Wapung Unit, u samla Deiniwan Lyngdoh bad u General Secretary u samla Shwari Ryngkhlem, ka seng ka la pynpaw ba ha shnong Wapungskur bad Wapungshnong ki don bun ki karkhana kiba dei ki dukan workshop shna welding bad kiwei kiwei ki dukan kiba donkam ïa ka bor ding electrict kaba biang namar kumba long mynta ka jingsam bor ding ka duna bha kaba dei ruh na ka daw ba ki la mih bun ki long iïng bad ki skul hapoh shnong.
La ong ruh ba na ka daw ka jingduna palat ka bor ding ka ju wanrah ruh bun ki jingeh bad jingthut ha ka jingïoh bor ding.
Na ka liang ka seng ka kyntu ïa u Deputy Commissioner ba un sngewbha ban tuklar lem ha kaba ïadei bad kane ka jingeh ki paidbah bad ban pynioh noh da ka machine transformer kaba biang bad kaba heh ha shnong Wapung bad kumjuh ruh ban buh noh ïa ka Sub Station ha shnong Wapung.
Ha kaba ïadei bad kane, ka seng naduh ki snem kiba la leit ka la leit ban ïakynduh ïa ki heh kiba dei ha ka tnat bor ding East Jaiñtia Hills District bad buh ruh da ki jingthoh bad da myn ha ka 8 tarik u bnai ïaïong 2022 ka seng ka la leit buh biang da ka jingthoh ha khmat u Sub Divisional Officer jong ka tnat bor ding ha Moowakhu ha kaba ka seng ka la dawa ban buh transformer bad buh Sub Station ha shnong Wapung bad ka seng ka la pynpaw ruh ïa ki jingeh jong ki paidbah ha kaba ïadei bad ka jingioh bor ding ha shnong Wapungskur bad Wapung Shnong.
