Tang naka iing phlang, roi ka Persara UP School ban pynphriang jingstad ha Umsning

Nongpoh, Risaw 27: Ka skul Persara UP School, kawei naki shlem ai jinghikai ban pynphriang jingnang jingstad haka thaiñ Umsning mynta ka sngi hapdeng ka jingiphuh iphieng kala ioh ban pynkut noh ïaka jingrakhe ia u mawmer ka jingdap 25 snem (Silver Jubilee) ka jingïaid lynti naduh bala seng ïaka ha u snem 1997 ha kaba katei ka skul mynta kala roi la par bad don ruh palat 300 ngut ki khynnah pule.
Ha katei ka sngi ka jingpynkut noh ïaka jingrakhe ïaka Jubili Rupa la wan ban shim bynta da u Bah Jason S Mawlong MLA ka Umsning kum u kongsan haka jingdonlang ka kong Macdalyne S Mawlong MDC Umsning, Bah Sunshine Makri uwei naki khun samla ka thaiñ Umsning, PP Yadav BMC ka ophis u DSEO, Bah Bipul Thangkhiew President ka RBYF sengkmie, Bah Dipul Ryntathiang, Kong R Nongrum Headmistress Persara UP School bad kiwei kiwei ki riew rangbah.
Ha katei ka sngi la ioh ruh ban pynlait ïaka Souvenir halor ka jingïaid lynti jong ka skul bala pynlait paidbah da ki kongsan bad ki riew rangbah ha katei ka sngi.
Haba kren maitphang ha katei ka sngi naka liang u Bah George Dkhar Chairman ka Managing Committee jong katei ka skul u la pynpaw ba kam dei ka ba suk ka jingïaid lynti jong katei ka skul ka ba la mad shibun ki jingeh bad jingtynjuh ïaki nongseng ïa katei ka skul, ha ka ba ha kaba sdang ki don tang 10 ngut ki khynnah skul bad 2 ngut ki nonghikai ha kaba la shu shong tang haka iing phlang bala ker da ka kpait, hynrei lyngba ka jinglen lade, ka jingïaishah bad ka jingtrei shitom jong ki nongseng katei ka skul kala nang roi nang par parum pareh da ka jingkyrshan lang jong kiba bun ki riew rangbah, ki sengbhalang naduh ka RBYF, u Dr D.D Lapang u ba la kyrshan tulop ruh ïa katei ka skul haki por ba mynshuwa tad haduh ba katei ka skul kala ieng skhem bad roi kumba ka long mynta ha Umsning Lum Umpih.
U Chairman ba nyngkong duh ba dei ruh u Founding Member jong katei ka skul u Bah Shonding Marbañiang u la pynpaw ba bun naki paidbah ki beiñ ïa u haka por ba u sdang ban seng ïa katei ka skul, watla u dei u ba duna haka jingnang jingstad, hynrei khlem tieng khlem riej bad da ka jingkyrmen skhem ban pynphriang ïaka jingnang jingstad, ka jingangnud kam shym la lehnohei hynrei ka jingieng skhem jong katei ka skul ka paw shai ba ki nongïalam bad ki nongseng ba hashuwa ki trei shitom ban nang pynheh bad pyniar ïa katei ka skul.
U Bah Jason S Mawlong kum u kongsan u la pynpaw ka jingsngewkmen ban don bynta ha katei ka sngi bad ai mynsiem ïa ki bor pynïaid katei ka skul ba kan dang kiew shaphrang ban long ruh kum kawei naki shlem pule ban pynphriang ïaka jingnang jingstad haka thaiñ Umsning bad khlem pep katei ka skul kan sa poi ruh shaduh ka Secondary bad Higher Secondary.