Shillong, Rymphang 05: Hadien ba u nongïalam ba la rangbah bha ka Congress bad u Symbud Myntri Rangbah ka jylla u Dr RC Laloo u la rai ban ai jingkyrshan ïa u Bah Andrew Shullai u kyrtong ka All India Trinamool Congress (AITC) na Jowai constituency pyrshah ïa u kyrtong ka NPP u Bah Wailadmiki Shylla, na ka liang ka Congress ka la rai ban nym shim ïa kino kino ki lynti ban pynsaja ïa u Dr RC Laloo wat la ha ka jingshisha na ka liang ka Congress ka la rai ban pynïakhun da u Bah Daniel Dan kum u kyrtong ka party.
Haba ïakren bad u President ka MPCC u Bah Vincent H Pala u la ong ba ka rai ka party ban nym shim kino kino ki lad ban pynshitom ka dei namar u Dr RC Laloo u la shong thait na ka kam saiñ pyrthei bad u la kynjoh ktien ruh sha ka party ba un ym don bynta shuh bad ki kam ka party.
“Um ju wan shim bynta shuh sha kino kino ki jingïalang ka party bad um ju wan mih shuh ruh sha ka ophis ka party lait tang ha ka sngi thep vote ban jied ïa u President ba thymmai jong ka AICC,” bad u la ong ruh ba ba kat haduh mynta u Dr RC Laloo um pat shym la phah ïa kino kino ki shithi ba u la mih noh na ka party ong u Bah Pala.
“Ngi tip shai ba u Bah Andrew un mih noh na ka party bad kaei kaba u Bah Andrew u shim rai bunsien ka dei beit da ka jingai jingmut jong u Dr RC Laloo bad ngam sngew dei ba ngin shim kino kino ki jingpynshitom ïa u namar u dei u briew uba la ih bha ka rta saiñ hima pyrthei,” ong u Bah Pala.
U la ong ruh ba ka jingsbym shim ka party ïa kino kino ki lynti ban pynshitom ïa u Dr Laloo ka dei namar ka por ka la thmit than namar ka elekshon ka la don ha khmut.
U la ong ruh ba ka rai u Dr RC Laloo ban kyrshan ïa u kyrtong ka AITC kan don jingktah ïa ka Congress ha Jowai.
Shuh shuh u la kam ruh ba u kyrtong uba ka party ka pynïakhun na Jowai u dei u briew uba biang bha namar u don ka jingshemphang kaba jylliew bad u long ruh uba sngewrit.
U la ong ruh ba u Dr Laloo u la pheil ban pynjop ïa u Bah Andrew ha ka elekshon MLA ha u 2018 wat la u la kyrshan bad trei shitom ban punjop ïa u ruh.
Shuh shuh u la ong ba ka jingkloi than ki briew jong ngi bad wat ki nongïalam ki long kiba kloi ban kynriah nongrim bad kiba suk ban shah thied da ka pisa khlem da kheiñ pat ïa ki paidbah tang na bynta ka jingmyntoi shimet jong ki.
