Shillong, Rymphang 05 : Ki arngut ki Nongïalam ka Mahila Congress jong ka Shillong City ka Kong Niloufer Laloo bad Kong Meba Kharkongor, kila leit pynïasoh ïalade sha ka National People’s Party (NPP) ban kyrshan ïa u kyrtong Bah Ransom Sutnga ha kane ka elekshon MLA 2023.
Kine ki arngut ki longkmie kila pynïasoh ha ka sngi Saitjaiñ hashwa ba u Bah Ransom un leit ban thep kyrteng ïalade bad ba la pdiang burom ruh ïa ki da u nongïalam ka NPP u Dr. Don War bad Kong Eldora Lyngdoh kaba dei ka President jong ka NPP Womens Wing ka North Shillong, ha ka jingïalang duwai bala pynlong da ka National People’s Youth Front 17th North Shillong ha Khasi National Dorbar Hall, Mawkhar.
Hadien ba la dep pdiang ïa ki sha ka ïing jong ka NPP, kine ki arngut kila leit ban synran ïa u kyrtong ha ka jingleit thep kyrteng hakhmat u Returning Officer, ha ophis u Deputy Commissioner.
Ha kane kajuh ka sngi, nalor kitei ki arngut ki longkmie, kiwei pat ki nongïalam bad nongkyrshan jong ka BJP na Upper bad Lower Jail Road ki la mih noh na ka party bad pynïasoh sha ka NPP na ka bynta ban ai ka jingkyrshan ïa u Bah Ransom Sutnga ïa kaba la pdiang sngewbha da u Dr. Don War.
“Ka jingwan ban pynïasoh jong phi ka ai mynsiem shi katdei eh bad kan nang ïarap ïa nga ban ïoh ïa ka jingjop,” ong u Bah Ransom halor ka jingwan pynïasoh jong ki.
Lah ban kdew ba kiwei pat ki kyrtong kiban ïakhun ha kane ka elekshon MLA 2023 kaban sa long ha ka 27 tarik Rymphang ki kynthup u MLA Bah Edelbert Nongrum u ban ïakhun na ka VPP, u Dr. Aman War, DHS barim u ban ïakhun na ka UDP, Bah MH Kharkrang, IPS u ban ïakhun na ka BJP, Bah JA Lyngdoh MLA barim ka Nongspung ban ïakhun na ka Congress, Kong Elgiva G Rynjah na ka TMC, bah Michael Kharsyntiew kyrtong shimet, Pastro K Pyrtuh KAM bad kiwei kiwei.
