Da ka proseshon Iukharist pynkut ka Parish Pynthorumkhrah ïa ka jingrakhe Jubili Rupa

Shillong, Rymphang, 05: Ka Sts. Peter & Paul, Parish Pynthorumkhrah ha ka sngi U Blei ka la pynhap noh ïa ka jingrakhe ïa ka Jubili Rupa da ka nguh ka dem Blei ba la pynmynta da u Archbishop ka Jyllaniambah Shillong u Most Rev. Victor Lyngdoh uba la long kum u kongsan ha Mass Bakhuid.
Ha ka Mass Bakhuid u Archbishop Victor u la bsiap ïa ki khun Khristan jong ka Pynthorumkhrah Parish ba kin ïaineh bad pynskhem ïa ka jingngeit kaba ki la ïoh pdiang naduh ba la sdang ïa ka Balang ha kane ka Parish.
U la ai jingïaroh ïa ki paidriewngeit jong ka Pynthorumkhrah Parish kiba la burom ïa u nongprat lynti ïa ka Parish uba dei u Rev. Fr. Peter Schiavone, uba long u nongsharai mynsiem ba nyngkong eh jong kane ka parish nalor ba u la long u nongtei bad u nongbei pisa ban pynieng ïa ka Iingmane bathymmai.
Ha kane ka sngi, la sakhi lang da u Parish Priest u Fr. Laurence Nongkseh, kynthup ruh u Asst. Parish Priest u Fr. Festus Shadap, u Fr. Barnes Mawrie bad kiwei kiwei.
U Archbishop Victor u la pyllait paidbah ruh ïa ka Khanatang jong ka Balang ha Pynthorumkhrah ïa kaba la lum thup da ka Pynthorumkhrah Parish.
Ka Pynthorumkhrah Parish kaba la rakhe pynkut ïa ka jingdap 25 snem kum ka Parish, ïa kaba la pynbna da u Archbishop Tarsisius Resto Phanrang ban sdang bad plie ha ka 1 tarik u Ïaiong 1997 da u Sohblei Michael Marbaniang mynba u dang long u Administrator jong ka Shillong Archdiocese.
U Fr. Peter Schiavone, uba long u mishoneri ka jingïasyllok Salesian na ka ri Italy u long u nongsharai rangbah ba nyngkong eh uba la bet bad seng nongrim ïa ka Parish bad ïa ka skul.
U la long Parish Priest naduh u snem 1997 haduh u snem 2012. Namarba ka jingshitom ka la ban, kumta u la aiti noh sha u Provincial jong ka Shillong Province ban shimti noh da uwei pat.
Da ka jingwan jong u Fr. Ioannis War Pakma ban shimti thymmai naduh u snem 2012 haduh u snem 2019 ka la don ka jingpynjanai ïa ki rukom treikam.
Hadien ka jingshah pynkynriah kam noh ïa u Fr. Ioannis War Pakma sha kawei pat ka parish la shimti sa u Fr. Laurence Nongkseh.
Kumba long mynta ka Parish Pynthorumkhrah ka ieng bad ka kiew bha ha bun ki liang la ka long ha ka jingngeit, ha ka pule ka puthi, ki dei ki matti jong u Fr. Peter Schiavone uba ka nam bad ka kyrteng jong ki dang ïai sah haduh mynta mynne ha ki khun mynsiem jong kane Parish.
Ka Parish Pynthorumkhrah mynshuwa ka dei tang ka balang shnong jong ka Parish Mawlai, hadien ba la ïoh la ka jong ka Parish, ka la nang pynroi bad pynkha sa ar tylli ki Parish, kata, ka Mawpat Parish bad ka Nongmensong Parish.
Ha ka jingpynkut ïa kane ka jingrakhe Jubili Rupa, la pynlong da ka jingïaid proseshon Iukharist Bakhuid ha kaba la ïashim bynta da ki paidriewngeit na kylleng ki Parish jong Sor Shillong lem ryngkat ka jingsynran lang jong u Archbishop Victor Lyngdoh uba la ai ka kyrkhu kyrdoh ïa ki paidriewngeit hadien ka jingmane ïa ka Sakrament Bakhuidtam ka Duwan.
Hadien kane, la pynbud pat sa ka jinglehkmen ba la pynlong da ka Parish Council bad ka jingpynkup burom ïa ki riewniam shynrang bad kynthei kiba long ki soh jong u Mynsiem ban trei na ka Hima U Blei.