Bun ki kyrtong ba ïakhun pyrshah ha ka by-election ki donlang bad nga mynta : Kong Grace

Shilong, Rymphang 05 : Ka kyrtong jong ka NPP na Shella constituency, Kong Grace Mary Kharpuri ka la ong ba ka don ka jingïapher baklybak lada nujor ïa ka elekshon shiteng samoi bad ïa kane ka elekshon MLA kaban sa long ha ka 27tarik mynta u bnai.
Haba kren bad ki lad pathai khubor hadien ba la dep thep kyrteng ha kane ka sngi Saitjaiñ, katei ka kyrtong ka la ong, “Ka don ka jingïapher lada nujor ïa ka elekshon shiteng samoi bad kane ka elekshon mynta namar bun ki kyrtong kiba ïakhun pyrshah ïanga ha kato ka por ki donlang bad nga mynta,” ka la ong.
Ka la ïathuh ruh ba arngut na ki kyrtong kiba ïakhun pyrshah ha ka elekshon shiteng samoi, kata u Bah Mosjo Wanswet kyrtong ka PDF bad u Bah Komen Laitmon kyrtong shimet, mynta ki la wan ban treilang na ka bynta kane ka elekshon kaban sa long shen.
“Kine ki rangbah ki khlem wan ban kyrshan ïanga shimet hynrei ki wan ban kyrshan na ka bynta ka jingkylla ïa ka Shella constituency baroh kawei. Nga ïohi ruh ba wat ki paidbah ki la kwah shisha ïa ka jingkylla,” ka la ong.
Nangta, ka la ong ruh ba kum kyrtong ka don ka jingsngewskhem ba mynta ka kynti kan poi sha ka jingjop donburom da ka jingkyrshan borbah jong ki paidbah ka Shella constituency.
Lah ban kdew hangne ba ka Kong Grace kaba ïakhun kum ka kyrtong shimet ha ka elekshon shiteng samoi na Shella ka la wan ba ar ha ka elekshon shiteng samoi na Shella constituency hadien ka jingkhlad noh u MLA ka thaiñ ba dei ruh u Lamphang ka Iing Dorbar Thawaiñ ka Jylla ha kato ka por, u Dr. Donkupar Roy.