Shilong, Rymphang 05 : U National Vice President ka NPP ba dei ruh u Symbud Myntri Rangbah ka jylla, Bah Prestone Tynsong u la ong ba ki paralok ba donlang ha ka sorkar MDA ha ki san snem ki ïatrei lang bad kim ju ong ei ei hynrei da la jan ka elekshon pat ki sdang ban kawang maw.
Haba kren bad ki lad pathai khubor hadien ba la dep ban thep kyrteng kum u kyrtong ka NPP na Pynursla, u Bah Prestone u la ïathuh ruh ba ki party ba donlang ha ka sorkar MDA ki la kynthoh jem ïa ka NPP ha ki constituency jong ki hynrei u ong pat ba ki paidbah ki dei kiba la stad bad kumta kin sa bishar.
“La san snem ngi la donlang bad kam shym la mih kaei kaei bad ka sorkar hynrei kynsan kynsan ha ka por elekshon, ki sdang ban kawang maw ïa ka sorkar ba ïalam da ka NPP. Tangba ngim sngew ei ei ai kin ong katba ki mon tang na bynta ka elekshon hynrei shah ngan ïathuh ïaphi ba ki paidbah ka jylla ki shaniah bad ki don ka jingsngewskhem ha ka NPP,” u la ong.
Haba kren pat shaphang ka constituency jong u ha Pynursla, u Bah Prestone u la ong ba u don ka jingsngewskhem ba un jop biang. U la ïathuh ruh ba ka civil sub-division ka la treikam pura mynta bad ka don ruh ka jingpynkhreh ban walla kham bun ki tnad sorkar sha katei ka sub-division naka bynta ka jingmyntoi jong ki paidbah.
“Ngi la ïoh ruh ïa ka jingmang pisa na ka bynta ka mini secretariat bad ka kam ka la sdang kumta ngi hap ban ap sa tang kumba shisnem shiteng ban pyndep ïa katei ka mini secretariat ha shwa ban ïoh pynkynriah noh ïa ka jaka treikam,” u la bynrap biang.
