Shillong, Naiwieng, 07: Ka Proseshon Eucharist kaba shisien shi snem jong ka Jylla Niambah Shillong kan sa long ha ka 12 tarik mynta u bnai.
Yn sdang ïa kane ka sngi, da ka Mass Bakhuid ha ka por 10:00 baje mynstep ban sa pynmynta da u Apostolic Nuncio ka Vatican sha India bad Nepal u Most Rev. Leopoldo Girelli ryngkat ka jingsakhi lang jong u Archbishop ka Jylla Niam Bah Shillong u Most Rev. Victor Lyngdoh bad ki lai ngut kiba dang shu dep shah pynkyntang kiba kynthup ïa u Bishop jong ka Jylla Niam Nongstoiñ u Most Rev. Wilbert Marweiñ, u Bishop jong ka Jylla Niam Jowai u Most Rev. Ferdinand Dkhar bad u Auxiliary Bishop jong ka Jylla Niam Aizawl u Most Rev. Joachim Walder.
U General Secretary ka Parish Pastoral Council (PPC) ka Cathedral of Mary Help of Christians u Bah Barnabas Nangbah ha ka jingïakren bad ki lad pathai khubor u la khot bad wer ïa ki paidriewngeit jong ka Balang Catholic na ka Jylla Niam Jowai bad Nongstoiñ ban ïashim bynta ha kane ka Proseshon Eucharist ka ban sa long ha ka por 1:30 baje nohphai sngi ka ban sdang na madan Calvary bad ïaid lyngba ka surok Dhankheti-Shillong Jowai bad wan phai sha Don Bosco Square bad pynkut biang ha madan Calvary.
Ha kaba ïadei bad kane, ki bor pynïaid jong ka Balang ki la ïatreilang bad ki bor Pulit jong ka Shillong Traffic Police ban pynbeit ïa ki rukom pynieng kali bad ban pynïaid ïa ki kali ha ka thain Laitumkhrah baroh kawei.
Ka jingpynbeit ïa ki jaka ieng kali ki long ha Madan Iew Rynghep, St. Edmund’s college, MIIT Brookdene, St. Margareth’s Convent, St. Mary’s Convent, St. Anthony’s H/S School Mini Stadium, Christ King College, Don Bosco Technical School, Parking Lot ka Loreto School (Hopkinson Road) bad madan Malki. Kiwei kiwei ki kali ki lah ban pynieng harud surok naduh Barik Point ter ter shaduh Pine mount School bad Seventh Set School, ha Lower Lachumiere naduh Horse Shoe Building shaduh DIPR, ha Treasury Office, ha pyrshah ka Additional Secretariat shaduh Barik Point, ha lyndet iing u Lat, hakhmat ka Don Bosco Hall (Hopkinson Road), ha surok Jacob’s Ladder bad ha Boyce’s Road Shillong College -Bajoria School.
“Ha kaba ïadei bad kane, ngi la buh ruh ïa ki Traffic Volunteers ha baroh ki Parking Lot bad ngi kyrpad ïa ki trai kali ba kin ai ka jingïatreilang khnang ban pynieng ïa ki kali ha ka rukom kaba dei bad ban ktah ïa ka leit ka wan jong ki kali. La kyrpad ïa kito kiba pynieng ïa ki kali harud surok ba kin ieng tang shiliang khnang ban ym wanrah ïa ka jingdheng kali,” la kyrpad u General Secretary ka PPC.
Da ka jingïatreilang bad ki bor synshar district, ka PPC ka la pyntip ba ka shilynter jong ka surok naduh Dhankheti-Shillong Jowai Road-Laitumkhrah Main Road-Don Bosco Square – Calvary la pynbna kum ka NO PARKING ZONE ha kan ka sngi.
Yn khang ban ïaid kali na surok Dhankheti-Don Bosco Wquare naduh ka por 8.45baje mynstep tad haduh ban da wai ki jinglehniam.
Yn pyrkhing da ka No Entry ïa baroh ki kali kiba ïaid ha shilynter jong ka surok Shillong-Jowai Road ha Barik Point bad ha Fire Brigade naduh ka por 12.00 baje mynsngi haduh ka por 3.30 baje nohphai sngi (tad haduh ba ka jingïaid proseshon kan da pyndep na Fire Brigade point). Ki bor synshar district ki la pyntip ruh ba yn ym shah ban die jingdie ïano ïano ruh, ha shilynter ka surok ïaid proseshon, kata naduh surok Dhankheti-Shillong Jowai Road, Laitumkhrah Main Road bad ha Don Bosco Square.
“La kyrpad ïa ki paidriewngeit ba kin long kiba leh khuid bad bret ïa ki jaboh jabaiñ ha ki shang bad ki borti bret ñiut ba la pynkhreh lypa ha ki jaka pynieng kali,” la ong shuh shuh ka PCC.
