Shillong, Naiwieng, 07: U President ka United Democratic Party u Bah Metbah Lyngdoh u la ong ba ka party shen kan sa rai ban pynbna ïa u kyrtong na ka bynta ka elekshon Lok Sabha.
“Ngi dang shu sdang ïa ka kam bad kyrmen ba ngin sa lah ban pyntip kham kloi katba lah,” ong u Bah Metbah ha ka jingïakren bad ki lad pathai khubor ha ka sngi Baar.
U la ong ba kito kiba kwah ban ïakhun na ka UDP ki lah ban wan shakhmat.
“Ka kam dang shu sdang bad kito kiba kwah ban ïakhun na ka UDP ki lah ban wan shakhmat. Ngin sa pyntip shen (halor ka rai ba la shim)” ong u Bah Metbah.
Haba kyntait ban ïathuh ïa ka kyrteng jong ki briew kiba la pan tiket, u Bah Metbah u la ong, “ïa mynta ngam pat lah ban ong eiei, ki don bun ngut bad ngin dang ïakren shwa ha ka jingïalang jong ka party bad hadien kata ngin sa ai jingtip.”
“Ngi pdiang sngewbha ïano ïano kiba kwah ban ïakhun. Ngin ïakren shwa bad ka shong ha ka party ban rai,” u la ong.
Ka thymmei khubor ka ïathuh ba ki don 6 ngut ki kyrtong ba kynthup arngut ki bym dei ki dkhot ka UDP kiba la pan tiket ban ïakhun na Shillong Parliamentary Seat.
Ki arngut ki bym dei ki dkhot ka UDP ki long u President ka Khasi Author’s Society (KAS) u Dr. DRL Nonglait bad u President barim ka HYC u Bah Robertjune Kharjahrin.
Kiwei pat na ka UDP ki long u Myntri ka Sorkar Jylla Bah Paul Lyngdoh, u General Secretary uba long u MLA barim ka -Nongthymmai u Dr. Jemino Mawthoh, u Vice President uba long u MLA barim ka Mawlai Bah PT Sawkmie bad u MDC ka Sohra uba long u CEM barim ka KHADC u Bah Titosstarwell Chyne.
