Shillong, Naiwieng 01: Ka sorkar jylla lyngba ka tnat kam jngohkai pyrthei ka don jingthmu ban wanrah da ka Polisi bad ka aiñ ban mana ne khang ban tei jingtei hajan ki katto katne ki jaka jngohkai ha kylleng ka jylla Meghalaya.
ïa kane la pynbna da u Myntri ka tnat kam jngohkai pyrthei Bah Paul Lyngdoh hadien ka Consultation Workshop bala pynlong ha Pine Wood Hotel.
Kat kum ka jingong jong u, kane ka jingthmu ban wanrah da ka Polisi ka dei na ka bynta ban pynneh pynsah ïa ki jaka ba itynnad hapoh ka jylla baroh kawei.
U Bah Paul ula ong ba naka liang ka tnat jngohkai pyrthei ka don ruh ïa ka jingthmu ban buh noh da ka Tourist Body na ka bynta ban peit ïa ka bha ka miat bad ïa ka jinglong shngaiñ ki nongwan shangkai pyrthei kiba wan ha Meghalaya.
Ula ïathuh ba kiwei jylla hapoh ka Ri India ki don da ki Tourism Police ban peit ïa ka bha ka miat bad ka jinglong shngaiñ ki nongwan shangkai hynrei ula pyntip ba ha Meghalaya ka dang ïahap ban don daka Tourist Body.
“Naka bynta ban pynneh pynsah ïa ki jaka ba itynnad ha Meghalaya, ka sorkar kan wanrah syndon daka Bill hapoh ka ïing dorbar thawaiñ bad ka policy, ki ban mana bad khang ban tei jingtei, ban tih marpoh khyndew lane ban tei ïa ki karkhana Coke ha kum kine ki jaka” ong u bah Paul.
U Bah Paul ula ong ba ka jingdon ïa ka Polisi bad ka aiñ kan ïarap ïa ka sorkar ban pynbna ïa ki katto katne ki jaka hapoh Meghalaya kum ki ‘Eco Sensitive Zone’ bad ha kum kine ki jaka, yn pyrkhing ruh ïa ka jingïarung ïa mih ki briew.
