Shillong, Naiwieng 01: Ka Shad Nongkrem ne ka Pomblang Smit, kaba dei ka jinglehniam ban ainguh aidem bad ban pan ban kyrpad ïa u Lei Shyllong jong ka Hima Khyrim kala sdang mynta ka sngi ha phyllaw jong ka ïingsad ïing sunon.
Ha kane ka sngi ka la don ka shad ka kmen bad ka leh niam leh rukom, kaba kynthup ruh ïa ka jingpom blang ba la tip kum ka Pom blang ïewduh.
Hynnin ka sngi, ka la don ka jinglehniam leh rukom ha ka Raid Mawlieh, ha kaba ki 11 Raid, kiba kynthup ïa ka Raid Mawlieh bad ki shnat Raid pat ki kynthup ïa ka raid ri 6 kur, shnat Raid Sha- twiat, shnat Raid Pyrjat, shnat raid, Na Shaiñ, shnat raid Li-ting Nongsohphan, shnat raid Nongshken, Shnat Raid Nongkhlieng, Shnat Raid Wahkhen, Shnat Raid Mawja, Shnat Raid Mawlam bad na ka Liang u Basan pat u pynpoi pat sha tyngkong ka ïing sad ka ïing sunon ka Hima Khyrim.
Haba kren ha kane ka sngi na ka liang u Basan ka Raid Mawlieh u Dr Firmly Lyngdoh u la khot la wer ïa ki shnat raid ba kin bat kin ksoh la ka niam bad ki riti ba la hiar pateng naduh kulong kumah bad kito kiba ym ju don bynta shuh ha ka niam lyngba ka bujai blang ba kin pyrshang wad ïa ka lad ka lynti bad ka hukum Blei ban don bynta biang ha ka niam jong ka hima kumba la buh la seng da u ñi u kong bad ki long shuwa man shuwa.
Ha kane ka sngi la ïoh ïa ka jingkren na ki Sordar bad Secretary ki Raid kiba la pynpaw la ka jinglap jingshem ha la ki shnat Raid bad ruh ïa ki jingeh ba ki ïakynduh ha ka kam synshar khadar.
Ha kane ka sngi la wan ruh ban sakhi lang ïa kane ka jingshimti ïa u Balang u tylli bad u bhet da ki ophisar na KHADC kiba la ai ruh ka jingkren ban sneng bad kyntu ïa ki khun ki hajar ki raid ba hap hapoh ka Raid Mawlieh.
