Hiar khynra nongbylla bar jylla ki Pulit bad ophisar Labour Dept ha Eastern West Khasi Hills
Lap ba bun ki Kontraktor kiba pynkheiñ ïa ka Aiñ 2020
Shillong, Naiwieng 01: Ka sorkar MDA-I ha ka snem 2020, ka la wanrah ïa ki rule jong ka aiñ Meghalaya Indentification, Registration (Safety & Security) of Migrant Workers Act, 2020.
Ïa kine ki Rule la tip kum ka Meghalaya Indentification, Registration (Safety & Security) of Migrant Rules, 2020. Kine ki rule ki long ban teh lakam ïa ki nongbylla na shabar jylla kiba wan trei bylla sha ka jylla Meghalaya.
Katkum ka Section 4 jong kane ka Rule, baroh ki nongbylla bar jylla ki hap ban rejistar ïalade kum ki nongbylla kiba wan bylla shane ha ka tnad Labour lyngba ki ophisar kiba la thung da ka tnad treikam jong ka Labour. Ka dor jong ka bai registration ka long 50 tyngka bad hadien ba ladep ïa ka registration, ka Labour Department kan ai ïa ki Registration Card.
Kane ka Registration ne ka jingithuh ïa ki nongbylla bar jylla la ju por hynriew bnaiïa kaba ki lah ban pynthymmai ynda la kut ka hynriew bnai.
Kiba lah ban register kum ki nongbylla kidei tang kiba lah ban pynshisha ba kidei ki nongshongshnong ka ri India.
Lyngba kane ka rule, ki Pulit jong ka tnad Infiltration jong ka Eastern West Khasi Hills District ryngkat ka jingïatreilang ka tnad Labour, ki la hiar ba khynra ïa ki nongbylla bar jylla ha ki katto katne ki bynta jong ka District hadien ba ki la ïohi ba don ki nongbylla bar jylla kiba la wan bylla shane. Ki Pulit bad ki ophisar ka Labour ki la hiar khynra sha Kynshi ha kaba la don ki bar jylla kiba wan bylla shna Pandal bad kiwei kiwei de ki jingtrei.
Na ka liang ki briew sorkar ki la lap ba don 23 ngut ki nongbylla bar jylla ha kawei ka jaka shna Pandal ki bym pat register satia bad ka Labour Department, hynrei ki don tang ka Adhaar Card.
Katkum ka Rule, kadei ka bynta jong ki Pulit ban peit ba kine ki nongbylla kidei ban pynshisha lyngba ki kot ki sla kum ki Adhaar Card ba kidei ki nong India.
Na ka liang ka Labour pat ka la bthah ïa kine ki nongbylla ba kidei ba register bad ka Labour Department, lym kumta kin nym lah ban wan bylla ha kane ka jylla.