Yn rat dyngkong naphang ki pulit ïa ki kam dawa pisa ha ka jylla ong u Dy CM

Shillong, Naiwieng 01 : U Symbud Myntri Rangbah ka Jylla ba khmih ïa ka Tnad kam Pohïing (Police) bah Prestone Tynsong ula pynthikna ba ka Tnad Pulit kan pyrshang kat kaba lah ban pynkut noh ne ban rat dyngkong naphang ïa ki kam dawa pisa jubor jong ki kynhun bapher bapher hapoh ka Jylla.
“Ngi la trei shaid shaid ïa ka kam bad ngin pynthikna nangne shakhmat ba kam dei ban don shuh ka jinglum pisa beaiñ ne ka jingdawa pisa” ong u Bah Prestone haba ïakren bad ki nongthoh khubor.
Kane ka jingkynthoh u Myntri ka la mih hadien arsngi ka jingshah kem u President ka Hynniewtrep National Youth Front (HNYF) East Khasi Hills District u Bless Dkhar halor ka jingkynnoh ba u donkti ban lum pisa na ki trok ba kit palat pud, ba kin ïoh ïaid na ka jingkieng Damsite, Umiam.
Haba pynpaw ba ym don mano mano ruh kiba long halor ka aiñ, u Bah Prestone ula ong “La ki dei ki shynrang ne kynthei ne ki Sengbhalang ne mano mano ruh, nga kyrpad ba kim dei ban leh ïa ki kam ba palat pud. La phi ong ïa ka kam dawa pisa jubor ne kano kano ka kam beaiñ, ngi kyrpad ïa phi ban burom ïa ka aiñ”.
Halor ka jingkylli, u Bah Prestone ula ong ba ki Pulit ki kem tang ïa ki riew runar kiba donkti ha ki kam bymman.
“Ka shong ha ki Sengbhalang lada ki don eiei, ai ba kin ai jingpynshai namar haba ngi kem ïa ki, ngi kem namar ki kam bymman. Ngim lah ban ong eiei la ki dei jong kino kano ka kynhun hynrei ki briew ba ngi kem ki dei kiba donkti ha ki kam bymman” ula ong.
U Bless Dkhar uba shah kem na Pohskeh, la ïalam tian bishar ïa u hapoh ka ïing bishar District ha ka sngi Ba-ar, kaba la ai bor ïa ki Pulit ban pynlong ïa ka jingtohkit ba bniah haduh 3 sngi.