Shillong, Naiwieng 01 : Ki Pulit ka East Jaintia Hills ki la ïoh kem ïa uwei u nongkhaïi droks bad ïoh kurup haduh 2 kilo u dawai kuli Amphetamine na Lad Rymbai Datsympein hynne ka step sngi Balang.
Une u Nongkhaïi droks u kyrteng u Sanju Singh uba dei u Nongshong shnong ka Them Metor, Shillong. La ïathuh ba une u briew ula wan na Silchar da ka Night Super AS20-9990 sha Shillong lem bad kine ki droks, ong u Superintendent of Police ka East Jaintia Hills Jagpal Singh Dhanoa.
Une u Heh Pulit u ïathuh ba hadien ka jingïoh jingtip ba thikna, ki pulit kila pynïeng ïa ka khyrdop talasi ha Lad Rymbai Datsympein ha ka por 5 baje mynstep bad kila ïoh ban bat ïa kane ka bos.
Na ka met jong u Sanju la ïoh ban kurup ïa artylli ki pla kiba thep ïa 2.771 ki lo u dawai kuli Amphetamine.
Ia une u briew la register case ha Khliehriat Police Station hapoh ka kyndon NDPS Act bad ka jingtohkit mynta kala ïaid shakhmat.
