Shillong, Naiwieng 1 : Kawei ka longkmie kaba kyrteng ka Poonam Singh ka la ujor da ka ejahar (FIR) sha ki pulit jongka Laban Police Station hadien ba ka la shah dung ha la u kurim u Suresh P SIngh na ki bynta ka kpoh da ka kynja tiar ba nep kat haduh ba kan da mynsaw jur bad hap ban pynkit ïa ka sha Civil Hosptal.
Kane ka jingjia kala jia tang namar ba la mih ki jingïania kiba jur hapdeng ka longkmie bad u kurim jongka tang namar ba ka phah thied tiar na ka bynta ka khun.
Ha ka FIR kane ka longkmie kala ïathuh ba “Mynta ka step ka la ong ïa u kurim jongka u Suresh Singh ban pynthied jingbam ïa ka khun na dukan hynrei um treh satia namar u ong ba um don pisa” Ka la ong biang ha katei ka por da ka jingbitar ka la ong “ Me don pisa ban pynlut na ka bynta ka Bala bad phah ai rong ïa ka ïing jongka hynrei mem don pisa na ka bynta jong ngi”. Kumta kane ka jingïania ka la nang khluit nang khluit bad u la shim da ka tari bad dung ïa ka na kpoh bad kynjat ruh ïa ka na skhep bad khyrwait ruh ïa ki shympriahti jongka. “ Nga la lyniar bad la wan mih ka khun kaba la ïohi ïa nga hapdeng ka jingphlei snam. Mar mar nga la pyntip sha ki pulit bad ki pulit ki la wan bad kit ïa nga sha Civil Hospital” pynpaw ka Poonam ha ka FIR.
