Shillong, Naiwieng 01 : U Bah Process T Sawkmie MLA barim ka Mawlai Constituency u la pynpaw ba lada ka sorkar ka mon da kaba suk ka lah ban pynurlong ïa ki jingdawa ka Meghalaya Asha Workers Union (MAWU), kiba la dawa ban kyntiew pynheh ïa ki jingsiew incentive bad kiwei de ki jingdawa, kiba ki la buh hakhmat ka sorkar lyngba ka myntri ka koit ka kong Ampareen Lyngdoh ha kine ki khyndiat sngi.
U bah Sawkmie u la pynpaw ïa kane ka jingsngewkhia na ka bynta ka seng ki Asha ka MAWU haba kren sha ki lad pathai khubor ha ka sngi Balang ka 1 tarik u Naiwieng, 2023 ha ophis treikam jong u ha Mawlai Nongpdeng.
U la ong ba ka jingdawa jong ka MAWU ka long kaba dei ba ki donkam ka incentives kaba kham heh bad ba ka sorkar kam dei ban klet ïa ki Asha kiba la trei shitom bad kiba la aiti met bad mynsiem ban shakri ïa ki paidbah, khamtam ha ka por ba ka jylla ka mad ïa ka khlam covid 19, ha u snem 2019 bad 2020.
Kumta u bah Sawkmie u kyrpad ïa ka sorkar ba kan sngewthuh ïa ki jingeh ba ki Asha ki mad bad ban shimkhia ban pynurlong ïa ka jingdawa jong ki.
U kyntu ruh ïa ka sorkar ba kan pyrshang ban buh budget ne ban mang tyngka noh na ka bynta ki Asha ha ka dorbar ka ban wan, khnang ba kin lait ban dawa na ka por sha ka por.
U ong ruh, ha ka jingshisha ïa ki briew kiba trei shitom kum ki Asha ym donkam ba kin dawa, hynrei la dei ban ai khusnam pynkup burom ïa ki.
