Shillong, Naiwieng 01: Namar ka jingsngew sohsat namar ka jingsahkut kali bad kumjuh ruh ka jingshah kheiñ beiñ ha ka tnad PWD, ki Pulit jong ka Lumdiengjri, kynthup ruh ïa kiba peit ïa ka traffic, mynta ka sngi ki la ïamih hi ban moramot ïa ka surok National Highway kaba don mar pyrshah bad kane ka thanad ha nongbah Shillong.
Kane ka surok kadei kawei napdeng ki surok kiba bun bha ki kali ba ïaid namar kadei kaban leit sha Guwahati bad kaba wan ruh na Guwahati. Namar ka jingsniew palat kane ka surok ha kaba la shu don beit da ki thliew ki syar, ki kali ynda la poi ha kane ka jaka ki hap ban ïaid suki suki bad don ki por ruh ba ki sahkut hangne. Kane ka la wanrah ka jingsahkut kali kaba jur bha na ka por sha ka por ha kane ka jaka.
Khnang ban ïarap ïa ki paidbah bad khamtam eh ban pynduna ïa ka jingsahkut kali, ki Pulit kane ka thanad ki la ïa mih ban pyndap khyndew ïa ki jaka ba long thliew bad kine kiba ïashim bynta ban pyndap khyndew kidei kiba don ha ka duty namar ki phong da ka uniform.
Haba la kylli balei na ka liang ki Pulit ki hap ba mih hi ban moramot ïa kane ka surok, na ka liang ki PUlit ki a ïathuh ba la bunsien ki la thoh sha ki bor ka tnad PWD ban moramot noh ïa kane ka surok, hynrei baroh ki jingkyrpad, ki jingkyntu jong ki, kim shym la longkam satia. Kumta kim banse ban leh hi noh, haba ki la ïohi ba ka daw jong ka jingsahkut kali ha nongbah Shillong, kawei na ki daw kadei ka jingsniew palat kane ka surok, namar tang la sahkut kali ha kane ka bynta, ka la ktah lut ïa ka nongbah Shillong baroh kawei.
