Shillong, Rymphang 22 : U Myntri ka tnad Bording ka sorkar jylla u Abu Taher Mondal ha ka sngi Palei u la kular ba ka sorkar kan siew ïa ka bai luksan sha ki bahaiing jong u nongap pahara ka tnad uba la duh noh ïa ka jingim na ka jingshah bat bording ha sub-station kaba don ha Umïam.
“Dalade hi nga la shimkhia ïa kane ka kam bad ka MeECL bad nga kular ba ka bai luksan yn ai sha ki bahaiing jong utei u lanot,” ong u Myntri haba jubab halor ka call attention notice ba wanrah da u MLA ka Mawlai, Bah Brightstarwell Marbaniang ha Iing Dorbar.
La ïathuh ba utei u rangbah ba tip kyrteng kum u Kyrshanborlang Muktieh, uba dei u nongap pahara miet u trei bad ka M/s ITD Cementation India Limited u la shah bat bording ha ka 29tarik u Kyllalyngkot hadien ba u la tyngkhuh bad u sainar bording uba wan na u transformer katba u dang rung sha katei ka sub-station.
U Myntri u la ithuh ruh ba une u rangbah ba kynduh ïa kane ka jingjia u trei kum u nongap pahara bad katei ka kompeni kaba peit na ka bynta ka jingtrei ïa ka wah Umïam Stage I kaba dang ïaid mynta shaid shaid.
Halor kane, la ïathuh ba la dep ruh ban ujor da ka FIR sha Mawlai Police Station ba haduh mynta ki dang ap ïa ka report.
U la ïathuh ruh ba katkum ka Accident Report kaba 29tarik Kyllalyngkot, la phah sha u Senior Electrical Inspector ka sorkar jylla ban pynlong da ka jingtohkit khnang ban lap ïa ka daw tynrai halor kane ka jingjia.
La ong ruh ba ka report jong u Senior Electrical Inspector ka kdew ba ïa u Muktieh la lap da ki pulit ba u thiah khlem tip briew shuh hapoh ka distribution sub-station, kiba dang pyndep ïa ka kamram ha katei ka main bad kumta mar mar la pyntip noh sha ki bor pynïaid jong ka ITD Cementation India Ltd.
Shuh shuh la ong ba ka report katkum ka enquiry report la lap ba u Bah Muktieh u la pyndep ïa ka kamram ha ka sentry post, Umïam hapoh ka kompeni ITD Cementation (India Limited) bad hadien kane u rung pat sha sub-station. Hynrei la ong pat ba ïa ka daw tynrai jong ka jingïap jong u yn sa lah ban pynshisha tad haduh ban da ïoh ïa ka report na ki pulit bad na ki medical officer.
Na ka liang u Myntri u la ïathuh ruh ba ka MeECL ka la kyntu ïa ka kompeni M/s ITD Cementation ba kan pyllait noh kham kloi ïa ka jingkyrshan pisa kum ka EPF bad ka insurance sha ki bahaiing hasem jong utei u rangbah ba khlad ha katei ka jingshah bat bording namar ba u ïap ha ka por ba u don ha ka kam.
La ïathuh ruh ba la bthah ïa u kontraktor ba un pynïaid shakhmat ïa ka kam katkum ki kyndon ba la don.
