Shillong, Rymphang 22: Ha Meghalaya, ka jylla kaba don tang 60 ngut ki MLA bad tang 12 ngut ki Minister, hynrei ki Chairman pat ki don haduh 175 ngut. Kane ka long katkum ka jingkheiñ ba la pyntip da ki bor sorkar na Secretariat.
Kine ki 175 ngut kiba bat kam Chairman kidei na ki Political Party kiba pynlong ïa ka sorkar MDA-2, kata na ka NPP,UDP, HSPDP,BJP bad Independent bad kidei kiba bat ïa ki shuki Chairman, Co- Chairman, Deputy Chairman, Vice Chairman.
Hynrei haba ïakren bad u Myntri Rangbah ka jylla, u Conrad Sangma, u la ong ba wat lada ki don haduh 175 ngut ki Chairman pynban u ong ba ka dang biang, namar ka jinglut haba siew ïa ki ha long tang 12 lak tyngka shi bnai. U la ong ruh ba ha ka jingsynshar paidbah donkam ïa ki briew kiban ïatreilang bad ki paidbah ha ki bynta kiba kham shapoh jong ka jingsynshar.
U Conrad u la ong ruh ka jingbun ki Chairman kam da dei eh kaba donkam, hynrei kaba donkam ka long ka jingtreikam jong ki Chairman kiba don ha ki Corporation, ki Board bad kiwei kiwei ki bor treikam. “Kaei kaba donkam ka long ba kine ki boe treikam kidei ban treikam bad wanrah ïa u soh bad ka jingmyntoi ïa ka jylla”, la ong u Conrad.
U la ïathuh ba dang shen u la ïoh ïa ka jingïalang bad ka Employment Generation Council ha kaba u la bthah ïa ki ba kin leh home work ban treikam na ka bynta ka jingdonkam khamtam eh kaba wanrah ïa ki jingai jingmut ban sha ka sorkar.
Hynrei ka tyllong khubor ba la ïoh da u nongthoh khubor ka ong ba kane kaba kdew u Myntri Rangbah ha kaba ïadei bad ka jingsiew sha ki Chairman kadei tang ka Honorarium, khlem pat kheiñ pat ïa kiwei pat ki jingsiew ba ki ju ïoh.
