Shillong, Rymphang, 22: U Myntri ka tnad kam jngohkai pyrthei u bah Paul Lyngdoh haba jubab ha ka kynta kylli jingkylli ïa ki jingkylli ba la wanrah da u MLA jongka North Shillong Constituency u bah Adelbert Nongrum, u la ïathuh ba kiba wan poi sha ka Cherry Blossom naduh ka 17 tarik haduh ka 19 tarik Naiwieng 2023 ki la kot sha ka 72,1699 ngut bad na kine tang kiba wan kyrpang na shabar ne ki nongwan jngohkai kyrpang sha kane ka tamasa kata kynthup na kiwei ki jylla ka ri India bad wat na shabar ri ruh ki la kot sha ka 23 hajar ngut.
U la ïathuh ïa kane ka jingwan kiba na shabar la ïoh jingkhein na kiba pynïaid ïa ki Hotel naduh ki Hotel kiba heh, kiba pdeng haduh kiba kham rit.
Kiba sah ha ki Hotel ba heh kum ka Vivanta, Mariot, Ri Kynjai ki la kot sha ka 1269 ngut, kiba sah ha ki Hotel ba kham pdeng kum ka Poinisuk, M Crown, Tripura Castle bad kiwei kiwei ki la kot sha ka 15205 hajar ngut bad kiba sah ha ki Guest House bad Home Stays ki la kot sha ka 6,517 ngut.
U bah Paul u la ïathuh lyngba kane ka tamasa ka sorkar kala ïoh lum khajna haduh 1.44 klur kata tang ha u bnai Naiwieng 2023. Lada ïa nujor bad ka khajna ba la mih na ki Hotel ha u bnai Risaw 2023 ka long tang 1.36 klur tyngka.
Lah ban pynkynmaw ba ka Cherry Blossom ka dei ka tamasa ba shisien shisnem ba ju pynlong ha u bnai Naiwieng bad ha u 2023 ruh ka long naduh ka 17 tarik haduh ka 19 tarik Naiwieng ha madan Kurkalang, Bhoirymbong harud ka surok Shillong Bypass. Ha kane ka tamasa la pynlong ïa ka rwai ka put ka tem ka shad, ki jingïakob rang bad thei bhabriew, jingdie ïa ki bam tynrai, ki tiar tynrai, ki mar rep bad bun kiwei kiwei.
Ha kane ka tamasa ba la dep la wanrah ïa ki nongrwai da ki nongpynïaid ka Rockski EMG kum u Ronan Keating, U DJ bad Music Producer u Jonas Blue, SANAM bad kiwei kiwei. La wan rwai ruh da ki nongrwai ba pawnam ka jylla kum u bah Lau Majaw, Blue Temptation, Meba Ofillia bad kiwei kiwei.
Na kane ka daw kane ka tamasa ka khring bha ïa ki nongwan jngohkai na shabar ri, shabar jylla bad ïa ki rang bad thei samla napoh ka jylla bad kane ka thaiñ shatei lam mihngi ka ri India.
