Shillong, Rymphang 22 : U Myntri Rangbah ka jylla, Conrad K Sangma ha ka sngi Palei u la ong ba ka sorkar jylla kam lah satia ban shu pyllait kumto ïa ka rukom tih maw tih shyiap ba ju leh ha ki por mynshwa khlem da don ïa ka quarry permit lane ka lease.
“Kam don satia kano kano ka kyndon ban pyllait ïa ka rukom tih shyiap, tih maw ba ju leh ha ka por mynshwa hapoh ka Meghalaya Minor Minerals Concession Rules (MMMCR), 2016 lane hapoh ka Mines and Minerals (Development and Regulation) (MMDR) Act, 1957, ka sorkar jylla kam lah satia ban pyllait ïa kane ka jingtreikam khlem da don ïa ka quarry permit lane ka lease ba la poi hapoh ka kyndon jong ka MMMCR, 2016,” ong u Myntri Rangbah ka jylla haba jubab ha Iing Dorbar.
Kane ka jingpynshai na u Myntri Rangbah kadei halor ka motion ba la wanrah da u MLA ka VPP na Nongkrem, Bah Ardent Miller Basaïawmoit halor ka jingeh ba ki nongtih maw tih shyiap jong ka jylla ki kynduh.
Tangba, u Myntri Rangbah u la pynpaw ba ki lah pat ban pynstet ban ai ïa ki jingai jingbit sha kito kiba pan jingbit na ka tnad halor kane.
Nalorkata, u ong ba kin don ki nongtrei ka tnad kiban ïarap ruh ïa kito ki paidbah ban pyndap ïa ki kot ki sla ban aplai bad ban batai ïa ki kyndon kiba ïadei na ka bynta ban aplai ïa kitei ki permit.
La ïathuh ba ki kyndon ka MMMCR ka kdew ïa ka jingpynkhreh ïa ka mining plan, ka environment clearance, ka pollution clearance hapoh ka Air bad Water Acts bad ruh ka jingbit na ka District Council.
U Myntri Rangbah u ong ruh ba katkum ka rai jong ka Supreme Court ha ka 03tarik Naitung 2019 ka ong ba ka kyndon Mines and Minerals (Development and Regulations) Acts, 1957 ka treikam lang ha ki jylla jong ka Sixth Schedule kynthup ïa ka Meghalaya bad ïa kino kino ki rukom khlong marpoh khyndew ha Meghalaya bad kiwei ki jylla ba don ïa ka Sixth Schedule ba kin bud katkum ki kyndon jong ka MMDR Act, 1957.
Shuh shuh u ong ruh ba mynta, na ka bynta ban ïarap ïa kito kiba aplai ban tih shyiap, ka Rule 4 jong ka MMMCR, 2016 la dep ban pynkylla da ka sorkar jylla lyngba ka notification kaba 4tarik Naitung, 2022.
