Yn siang rong bad pynitynnad ïa ka shnong Umsaw Nongbri shuwa ka jingrakhe Golden Jubili ka Pastorate

Nongpoh, Rymphang 28: Ka long ka jingkmen bad ka jingkyrkhu kaba khraw ïaka shnong Umsaw Nongbri ha Ri-Bhoi District hadien ba u Symbud Myntri Rangbah ka jylla u Bah Prestone Tynsong mynta ka sngi u la leit ban buh mawnongrim ban siang rong noh ïaka surok shnong ba 1km kum ka jingpynkhreh bad pynitynnad ïaka shnong shuwa ka jingrakhe ïaka jingdap 50 snem ne Golden Jubilee ka Pastorate ha u snem 2025 bala mang pisa ruh haduh 90.61 lakh.
Ha katei ka jingbuh mawnongrim ban siang rong ïa u surok shnong la wan ban sakhi da ka jingdonlang u Bah Mayralborn Syiem MLA ka Nongpoh, Bah Balajied Ranee MDC ka Nongpoh, Bah K. K Mawa Secretary jong ka Tnad PWD, Raja Brahma ADC Ri Bhoi, Bah D Langstang CE PWD, Bah U. Kurbah Executive Engineer jong ka PHE, bah BD Mawphniang Rangbah Shnong Umsaw Nongbri, ki pastor bad tymmen basan ka Balang Presbyterian Umsaw Nongbri, lem bad kiwei kiwei ki ophisar bad ki riew rangbah.
Kum ban shu kdew hangne ba ka Reception Committee jong ka Balang Presbyterian Umsaw Nongbri kala leit mih sha u Bah Prestone Tynsong ban ïarap kyrpang ïa katei ka shnong naka bynta ka jingdonkam ba kyrkieh khamtam u surok ban pynsuk ïaki paidbah haka leit ka wan bad khamtam ban pynitynnad ïaka shnong shuwa ka jingrakhe ïaka jubili ksiar.
Haba kren ha katei ka sngi naka liang u Bah KK Mawa Secretary ka tnad PWD u la ong ba katei ka surok yn siang rong thymmai da kaba pynïasoh na u surok PMGSY ba dang bha ha katei ka shnong bad yn pynbha ruh ïaki kynroh, ki nala ban pynitynnad ïa katei ka shnong.
Naka liang u Bah Prestone Tynsong haba kren ha katei ka sngi u la pynthikna ba katei ka kam kan sdang noh shaid shaid ha kine ki khyndiat sngi bad khmih lynti ruh ba yn pyndep ïaka haka por kaba biang naka bynta ka jingbit jingbiang jong ka leit ka wan ki paidbah khamtam ka jingpynkhreh ïa katei ka jingrakhe jubili ksiar jong ka Pastorate ha katei ka shnong.
U la ong ruh kumba ka shnong kala buh ruh ka dorkhas ban peit ruh ïa kiwei kiwei ki surok ba donkam ban pynïasoh na katei ka shnong sha kiwei ki bynta khamtam ka surok na Umsaw Nongbri lyngba ka Umphing ban mih sha Umden ha kaba naka liang u Bah Prestone u la bthah ïaki Engineer ka PWD ban leh ïa kaba donkam ba shen yn sa sdang noh ïaka kam.
U Bah Prestone u la ong ruh ba kane ka sorkar mynta kan dang pynjanai shuh shuh ïaka rukom treikam ban dang wanrah ki kam pynroi kumba ka dorbar mang tyngka ba dang shu dep la buh thong ïaka tnad pule puthi hakhmat eh bud pat sa ki kam pynroi surok bad ka tnad ka koit ka khiah ha kaba u la ong ruh ba ka sorkar ka don ka thong ba hakhmat eh ban pynpoi surok sha man la ki shnong bad ba ki paidbah kim donkam shuh ban ïaid da ki kjat hynrei baroh ki surok ki dei ban long kiba ïaid kali.