Shillong, Rymphang, 28: Kan long kaei kaei kaba phylla bad ka khubor kaba ai mynsiem ba kum ka jaitbynriew Khasi ki dang don na ki longïing longsem kiba dang don ïa ki jaka puta kiba la sumar bha da ki mynbarim na ka bynta ka pateng kaba bud nadien jong ki.
Nalor ka jingriewspah ka Ri Khasi lyngba ka jingdon ki marpoh khyndew, ne ka jingitynnad jong ka Mei mariang bad ka jingdon ki lum ki wah bad ki Kshaid ne ki dew lynnong, hynrei ki Matti ba la pynneh pynsah da ki longshwa manshwa ne ki riew hyndai hynthai ki la ïarap pat ban pynneh ïa kane ka jingriewspah jong ka jaitbynriew Khasi lyngba ki kam ki riew hyndai hynthai.
Lah ban ong ba ki la don bun ki ïew ki hat ha ki katto katne ki shnong bapher bapher bad kiba la pawnam bha naduh ki por ba dang synshar ki phareng, hynrei ka ïew kaba don ha ka shnong Nongkseh Upper Shillong ka la long kaba sngew sarong bha ha kaba ki pateng jong ki mynbarim ki la ïai bteng ban sumar sukher bad ban pynneh pynsah haduh kine ki sngi ban long ka jingmyntoi ïa kane ka pateng.
Kawei na ki jaka kiba mynta ka la sdang ban paw pyrthei kadei ka ïew ki mynbarim kadei ka jaka ba la long trai da ka kong Minorica Thangkhiew kaba dei kawei na ki jaka ha kaba ki mynbarim Hyndai hynthai ki la pynlong ïew bad ban don ruh ïa la ki jong ki Basa lyngba ki Mawbynna kiba don ha katei ka jaka kaba ka Kong Minorica ka la sumar sukher bha haduh mynta.
Lah ban pynkynmaw ba ha ka jingleit jurip kaba dangshen jong u Myntri ka tnat Arts and Culture uba dei ruh u Myntri ka tnat Tourism u Bah Paul Lyngdoh bad u Chairman ka MTDC uba long ruh u Myntri barim ka tnat Arts and Culture u Bah Sanbor Shullai la sakhi ba katei ka jaka kaba itynnad bha ka lah ban long sa kawei pat ka jaka ka ban khring ïa ki nongwan jngohkai pyrthei.
Halor kane, na ka liang ka Kong Minorica Thangkhiew kaba la long trai ïa kane ka jaka ka la lah ban ri ban sumar sukher bad ban pynneh pynsah ïa kane ka jaka jong ka, kumba ka la long naduh ki por hyndai hynthai bad kaba la ïai bteng ban sumar ïa kane ka jaka ba pawnam.
Halor ka jinglong trai ïa kane ka jaka bad ban pynshai ha kaba ïadei bad ka jinglong trai ïa kane ka jaka na ka liang ki katto katne ki nongthoh khubor ki la ïoh ïa ka jingpynthikna ba katei ka jaka kadei hi kaba la long trai da ka Kong Minorica Thangkhiew ym ba la long trai da ka Kur Thangkhiew kumba la mih ha ki lad pathai khubor ha ka sngi ba leit jurip u Myntri ka Sorkar jylla u Bah Paul Lyngdoh bad u Chairman ka MTDC u Bah Sanbor Shullai ha ka 26 tarik mynta u bnai ha ka jingïadonlang ki heh ophisar sorkar.
Ha kane ka jingjurip ha kaba ïadei bad kane ka jaka jong ka Kong Minorica Thangkhiew lah ban ong ba na ka liang u Myntri u la ong ba na ka liang ka tnat kaba u la khmih kan sa wad ïa ki lad ki lynti bad ban dang pynlong ruh ïa ki jingïasyllok ha baroh ki liang ha shwa ban pynbna ïa ka kum ka Heritage site ne ka jaka kaban ïoh ki lad jingïada, ban sumar sukher bad ba kin ym jot ne shah pynjulor khnang ba ynda ki kam bad ki kaiphod ki la dep kan sa long sa kawei pat ka jaka ka ban khring ïa ki nongjngoh kai bad kan sa plie lad ha ka ïohkam ïohjam.
