Shillong, Rymphang, 28: U President ka KSU South Khasi Hills District Unit u samla Reebokstar Diengdoh ka sngi Balang u la khot bad wer ïa ki nongshong shnong jong ka Elaka Mawlong ban mih ryntih ha ka sngi ba ka seng kan leit khyndang ïa ka jingpynkha iew be-aiñ ha Kalibari, da ki bar jylla kiba sah ha Ichamati bad ha ki shnong bamarjan.
Kane ka jingkhot jingwer jong une u nongïalam ka seng ka long hadien ba la ïoh jingtip ba ki bar jylla kiba ju leh ïa ka khaïi ka pateng hapoh ka shnong Ichamati mynta ki la kynriah jaka ban seng da ka iew thymmai ha ka shnong Kalibari.
Ïa kane u samla Reebokstar Diengdoh u la pynpaw haba kren ha ka jingïalang kynmaw buromk ïa ka lyngkhuh sngi ïap kaba snem snem jong u (L) Bah Lurshai Hynñiewta ha ka shnong Pyntha-umdan (Ichamati) kaba dang hap hapoh ka Sohra Civil Sub-division, East Khasi Hills district.
Une u nongïalam ka KSU u la ong ruh ynda ka seng ka la leit ban kyndang ïa ki bar jylla kiba seng iew be-aiñ Kalibari ka da kwah eh ïa ki durkhmat jong ki paidbah ka shnong Mawlong ba kin synran lang seng namarba ki sheptieng ïoh ba shisien ka sngi kin sa shah taplup ha ka jingjyllei jong ki bar jylla.
“Ngi sngewlem ngi pyrkhat lem na ka bynta jong phi, lashai ynda la dap lut da ki dukan jong kiwei pat ki jaidbynriew phin trei da kaei pat kam,” ong u President ka KSU.
“Mynta ngi wan beh ïa ki bar jylla ki bym don kot don sla ba shong dukan phim ai ka jingkyrshan, kan sa poi ka por ba ngin da la thait na ka liang jong ka seng kan dap da ki dukan jong ki bar jylla phin sa wan pan jingïarap na ka KSU. Ngi lei ngim don dukan hangne ha Pyntha-umdan, jar la katta ngi hap ban wan hiar na Sohra ban wan beh lut ïa ki bar jylla kiba la syrtap lut shisien ka sngi. Ngi donkam ïa ka jingkyrshan jong ki paradoh parasnam,” u la ong
“Nga kwah ba ki longkmie ki longkpa, ha ka sngi ba ngi hiar sha Kalibari ban kyndang ïa ki bar jylla kiba pynlong iew be-ain nga kwah ban ïohi ïa ka durkhmat jong ki trai shnong na Mawlong ba kin mih. Lada shah knieh ka jaka ha Kalibari phi dei ban sngewthuh ba ma phi kiba dei ban ïoh kynti kiba sah ha ka Elaka Mawlong,” la ong shuh shuh une u nongïalam ka KSU.
