Sateng ki kam namar bym don JE ha ophis ba dei peit ïa ki thaiñ khappud ha EJHD

Khliehriat rymphang 28: Ka Jaiñtia Youth Federation East Jaiñtia Hills, mynta ka sngi hapoh ka jingialam u President u bah J..Pala, ka la buh da ka jingthoh ha u Deputy Commissioner ka East Jaiñtia Hills District bad ka seng ka la dawa ba dei ban thung Junior Engineer noh ha ophis jong u Boder Area Development Office ha Khliehriat, namar kane ka ophis kam don JE shuh mynta la bun bnai bad ki kam ki jam kiba iadei bad ki shnong ha ki thaiñ khappud ki la shu sahkut bad sahteng lut.
Na ka liang ki nongïalam jong ka JFY na East Jaiñtia Hills ki la dep ïakynduh ruh ïa u heh sorkar uba dei u Officer Incharge bad hadien ka jingiakren u Officer u la kular ba un shim khia ïa kane ka kam ban pynsngew sha ki bor ba halor ban thung Junior Engineer ha katei ka tnat treikam ha Khliehriat khnang ban dup lah ban shna ïa ki mang tyngka ne ki estimate budget na ka bynta kito ki shnong kiba hap hapoh ki thaiñ khappud, la ong ruh ba ka shem jingeh ban pyntrei ïa kano kano ka project lada khlem don u nong planning uba dei u Junior Engineer, ha ka juh ka por ruh u BADO u la ong ba kane ka post ka dei ka la ju don ha ka office trei jong u, hynrei sngew lyngngoh ba naduh ba u wan shimti ïa ka kam kum u officer incharge yn don Junior Engineer bad mynta la jan don kumba shi snem.
Ka seng ka la pynsgew ruh ha u Deputy commissioner ka East Jaiñtia Hills District ïa kane ka mat namar ba kito ki shnong kiba don ha ki thaiñ khappud ki mad jingeh ha ka jing iadei bad ki skim pynroi bapher bapher ba ki dei hok ban ioh na kane ka office trei jong u Border Area Development officer, hynrei tang na ka daw ba ym don u Junior Engineer ba shna ïa ka plan estimate budget, ki kam ki sahteng, halor kane na ka liang u DC ruh u la kular ban tuklar ba ki paidbah kiba don ha ki khappud kin ioh jingmyntoi na kane ka ophis kaba dei peit ïa ki thaiñ khappud.
Ka seng ka kyntu jur ïa ka sorkar hapoh ka jingialam u Conrad K Sangma kum u myntri rangbah ka jylla ba dei ban shimkhia halor kane ka kam bad kum juh ruh ïa ki nongmihkhmat jong kine ki na East Jaiñtia Hills District, i kong Santa Mery Shylla bad kum juh u bah Kyrmen Shylla ba kin shimkhia lem halor kane khnang ba kan nym long ka jingduh jingmyntoi ïa ki paidbah ka thaiñ.